ცნობილი ფრანგი მსახიობი გასპარ ულიელი უბედური შემთხვევის შედეგად 37 წლის ასაკში გარდაიცვალა.

ფრანგული მედიის ცნობით, 18 იანვარს მსახიობს ქვეყნის სამხრეთ რეგიონში, სავოიში, თხილამურებით სრიალისას სხვა მოთხილამურე დაეჯახა და შედეგად ტვინის მძიმე ტრავმა მიიღო. გასპარ ულიელი საავადმყოფოში შვეულმფრენით გადაიყვანეს, თუმცა, სამწუხაროდ, მისი გადარჩენა ვერ მოხერხდა. პოლიციამ მომხდარის გამო გამოძიება დაიწყო.

ულიელი ერთ-ერთი ყველაზე ცნობილი თანამედროვე ფრანგი მსახიობი იყო, რომელსაც თავისი კარიერის განმავლობაში არაერთი ცნობილი რეჟისორის ფილმში მიუღია მონაწილეობა. მათ შორისაა ბერტრან ბონელოს Saint Laurent, ქსავიე დოლანის It’s Only the End of The World, ჟან პიერ-ჟენეს A Very Long Engagement და პიტერ ვებერის Hannibal Rising.

ის არაერთხელ იყო ნომინირებული გავლენიან ფრანგულ კინოპრემიაზე სეზარი, რომლის ჯილდო ერთხელ მოიპოვა კიდეც.

აღსანიშნავია, რომ გასპარ ულიელმა ცოტა ხნის წინ მონაწილეობა მიიღო მარველის მაღალი მოლოდინების მქონე სერიალში Moon Knight, რომლის პრემიერაც ჯერ არ შემდგარა — პირველი სერია 30 მარტს გამოვა.