სახალხო დამცველის, ნინო ლომჯარიას შეფასებით, მაშინ, როდესაც გამოძიება ერთი დღის დაწყებულია, მაღალი პოლიტიკური თანამდებობის პირებისგან წინასწარ გაკეთებული განცხადებები არასწორია. ასე ეხმაურება ის ჯანდაცვის მინისტრის კომენტარს, რომ პირველადი ინფორმაციით, დევნილების დასახლებაში მომხდარი "უბედური შემთხვევაა".

ომბუდსმენის თქმით, ის სანატორიუმ ქართლში მცხოვრებლებსა და შემთხვევის თვითმხილველებს ესაუბრა და აღნიშნა, რომ ამ ფონზე, გამოძიებას არ უნდა დარჩენოდა შთაბეჭდილება, რომ ეს შემთხვევითობა იყო.

"რა თქმა უნდა, ძალიან არასწორია, როდესაც გამოძიება ერთი დღის დაწყებულია, მაღალი თანამდებობის პირებისგან წინასწარ გაკეთებული განცხადებები და კვალიფიკაციის გამოცხადება გამოძიების პროცესში.

[...] მე გავესაუბრე თვითმხილველებს შემთხვევის, ვინც იცნობდა ამ გარდაცვლილს, ჰქონდა წინა დღეებში ურთიერთობა, თვითმხილველები არიან ამ შემთხვევის და მათი მონათხრობიდან ნამდვილად არ უნდა დარჩენოდა შთაბეჭდილება გამოძიებას, რომ ეს იყო შემთხვევითობა, ან უბედური შემთხვევა. თუმცა, რა თქმა უნდა, მე დაველოდები გამოძიებას, მაგრამ ამ განცხადების გაკეთება მიმაჩნია ცალსახად არასწორად, მითუმეტეს, რომ გარემოებები ამაზე არ მიუთითებს", — თქვა მან.

ლომჯარიას თქმით, სახალხო დამცველის რეკომენდაციაა, რომ საცხოვრებელი ფართებით დევნილების დაკმაყოფილება პრიორიტეტულად ნგრევადი ობიექტებიდან მოხდეს.

16 იანვარს, სანატორიუმ ქართლის შენობასთან დევნილი გარდაიცვალა. ადგილობრივების თქმით, ის სახურავიდან გადმოხტა და თვითმკვლელობის მიზეზი მათი მოთხოვნების შეუსრულებლობაა. სანატორიუმის ყოფილ შენობაში მცხოვრები დევნილები საცხოვრებელ პირობებს აპროტესტებენ. მათი განცხადებით, შენობა ავარიულია და საცხოვრებლად საშიში. რამდენიმე კვირაა პასუხისმგებელ პირებთან, მათ შორის ჯანდაცვის მინისტრთან შეხვედრას ითხოვენ.

როგორც შინაგან საქმეთა სამინისტროში On.ge-ს უთხრეს, გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას ითვალისწინებს. აღსანიშნავია, რომ ადგილობრივები სამართალდამცავ უწყებებს რამდენიმე საათის განმავლობაში არ აძლევდნენ ცხედრის ექსპერტიზაზე გადატანის უფლებას.

დღეს, 17 იანვარს ჯანდაცვის მინისტრმა, ზურაბ აზარაშვილმა განაცხადა, რომ სანატორიუმ ქართლში მომხდარი ფაქტი "უბედური შემთხვევაა" და ის დევნილთა პრობლემებს არ უნდა დაუკავშირონ.

ამავე თემაზე: