საქველმოქმედო ორგანიზაცია Oxfam-ის მიხედვით, მილიარდერებმა პანდემიის დროს თავიანთი ქონება $5 ტრილიონით გაზარდეს, რითაც მსოფლიოს ეკონომიკური უთანასწორობა კიდევ უფრო გამძაფრდა. ამ ყველაფერს კი ის ფაქტიც ემატება, რომ პანდემიამ მილიონობით ადამიანი გააღარიბა.

Forbes-ის მონაცემებზე დაყრდნობით Oxfam-ის მოხსენებაში ნათქვამია, რომ 2020 წლის მარტიდან 2021 წლის ნოემბრამდე მილიარდერების ქონება 8,6 ტრილიონიდან 13,8 ტრილიონ დოლარამდე გაიზარდა. ასე რომ, გასულ წელს მსოფლიოს 10 უმდიდრესი კაცის საერთო სიმდიდრე გაორმაგდა, რაც მათთვის დღეში 1,3 მილიარდი დოლარის გამომუშავებას ნიშნავს.

Oxfam-მა მოითხოვა, რომ უმდიდრესი ადამიანების გადასახადები მთავრობებმა ჯანდაცვის სისტემის დასაფინანსებლად, ვაქცინების შესაძენად და კლიმატის ცვლილებასთან დაკავშირებული პრობლემების მოსაგვარებლად გამოიყენონ.

"ჩვენი ეკონომიკური სისტემები არა მხოლოდ პანდემიისგან ვერ გვიცავს, არამედ ყველაზე მდიდარ ადამიანებს საშუალებას აძლევს, რომ კრიზისი ფინანსური სარგებლის მისაღებად გამოიყენონ", — ამბობს Oxfam-ის წარმომადგენელი.

მსოფლიო ბანკის შეფასებით, 2020 წელს მსოფლიოში 97 მილიონი ადამიანი გაღარიბდა და მათი დღიური საარსებო თანხა ორ დოლარზე ნაკლები გახდა. Oxfam-ის შეფასებით, ვაქცინაციამ უთანასწორობას კიდევ ერთხელ გაუსვა ხაზი. ამის მიზეზი კი ის არის, რომ მსოფლიოს ბევრმა მდიდარმა ქვეყანამ ვაქცინის იმდენი დოზა შეიძინა, რომ მათი მოსახლეობა რამდენჯერმე აცრას. თუმცა მათ არ შეასრულეს დაპირება, რომლის მიხედვითაც ვაქცინის ნაწილი განვითარებადი სამყაროსთვის უნდა გაეზიარებინათ.

გაეროს მსოფლიო სასურსათო პროგრამის დირექტორმა გასული წლის ნოემბერში მილიარდერებს მსოფლიო შიმშილის გადაჭრისკენ მოუწოდა. ამ მოწოდებას ილონ მასკმა ტვიტერზე უპასუხა და განაცხადა, რომ თუ ორგანიზაციას შეეძლო დაედგინა "ზუსტად როგორ" შეაჩერებდა შიმშილის , მაშინ "Tesla-ს აქციებს გაყიდდა და თანხას მსოფლიო შიმშილის დამარცხებას დაახარჯავდა". როცა გაერომ მსოფლიო შიმშილის გადაჭრის გეგმა წარმოადგინა, ილონ მასკს ამაზე საჯაროდ აღარ უპასუხია.

ასევე იხილეთ: