ბოლნისი-მარნეულის გზაზე მომხდარი ავტოსაგზაო შემთხვევის შედეგად ორი არასრულწლოვანის დაღუპვის ფაქტზე, სასამართლომ ბრალდებულს აღკვეთის ღონისძიების სახით პატიმრობა შეუფარდა.

"შინაგან საქმეთა სამინისტროს მიერ ჩატარებული გამოძიებით დადგინდა, რომ 2024 წლის 30 დეკემბერს ბოლნისის მუნიციპალიტეტში ავტომანქანით გადაადგილებისას ბრალდებულმა გამოიჩინა უყურადღებობა, ვერ უზრუნველყო სატრანსპორტო საშუალების უსაფრთხოდ მართვა და ორ არასრულწლოვანს შეეჯახა. მიღებული დაზიანებების შედეგად დაზარალებულები ადგილზე გარდაიცვალნენ.

სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 276-ე მუხლის მე-8 ნაწილით (ავტომობილის მოძრაობის უსაფრთხოების ან ექსპლუატაციის წესის დარღვევა, რამაც ორი ადამიანის სიცოცხლის მოსპობა გამოიწვია) წარედგინა.

პროკურატურის შუამდგომლობის საფუძველზე სასამართლომ ბრალდებულს აღკვეთის ღონისძიების სახით პატიმრობა შეუფარდა. სისხლის სამართლის საქმეზე გამოძიება გრძელდება", — ნათქვამია პროკურატურის მიერ გავრცელებულ განცხადებაში.

ბოლნისში, 30 დეკემბერს ავტოსაგზაო შემთხვევის შედეგად არასრულწლოვნების დაღუპვას დაპირისპირება მოყვა. დაპირისპირების შედეგად 8 მოქალაქე და რამდენიმე პოლიციელი დაშავდა.

შეგახსენებთ, 30 დეკემბერს, ბოლნისი-მარნეულის გზაზე ავტოსაგზაო შემთხვევა მოხდა, რომელსაც ორი არასრულწლოვანი ემსხვერპლა. მოგვიანებით, ავტომობილის მძღოლსა და ადგილობრივებს შორის, აღნიშნულთან დაკავშირებით შეკამათება მოხდა, რომელიც დაპირისპირებაში გადაიზარდა და შედეგად 8 მოქალაქე და რამდენიმე პოლიციელი დაშავდა.