ევროკავშირის საბჭოს მიერ გავრცელებული ინფორმაციით, EU-ს, მის წევრ ქვეყნებსა და იაპონიას შორის პირველი ორმხრივი ჩარჩო შეთანხმება, სტრატეგიული პარტნიორობის შეთანხმება ძალაში შევიდა.

EU-იაპონიის თანამშრომლობაზე, საბჭო განმარტავს, რომ ეს მნიშვნელოვანი შეთანხმება მხარეებს შორის ჩართულობას წარმართავს და უზრუნველყოფს მჭიდრო პოლიტიკურ და ეკონომიკურ თანამშრომლობას რეგიონული, ორმხრივ და მრავალმხრივ საკითხებზე.

"სტრატეგიული პარტნიორობის შეთანხმების წყალობით, ევროკავშირი და იაპონია უკეთესად შეძლებენ მრავალმხრივი და წესებზე დაფუძნებული გლობალური წესრიგის გაძლიერებას, რომლის ბირთვია გაერო, ერთობლივი ღირებულებებისა და პრინციპების დაცვას, როგორიცაა: კანონის უზენაესობა, დემოკრატია, ადამიანის უფლებების პატივისცემა, ღია ბაზრები, თავისუფალი და სამართლიანი ვაჭრობა", — აღნიშნულია ინფორმაციაში.

\რაც შეეხება ორმხრივ განზომილებას, საბჭო განმარტავს, რომ შეთანხმება უსაფრთხოების სფეროში თანამშრომლობას გააძლიერებს, თანამშრომლობას ტერორიზმთან და სერიოზულ საერთაშორისო დანაშაულებთან ბრძოლაში, ისევე როგორც, მასობრივი განადგურების იარაღის გავრცელების წინააღმდეგ.

ამასთან, განცხადებაში აღნიშნულია, რომ შეთანხმება გააძლიერებს სექტორულ თანამშრომლობას ისეთ სფეროებში, როგორიცაა: კოსმოსი, საინფორმაციო და საკომუნიკაციო ტექნოლოგიები, სამრეწველო პოლიტიკა, ენერგეტიკა, ტრანსპორტი, განათლება, კვლევა და ინოვაციები.

შეთანხმებას ევროკავშირმა და იაპონიამ 2018 წლის 17 ივლისს, ტოკიოში მოაწერეს ხელი.

2024 წლის 5 აპრილს კი წევრმა ქვეყნებმა შეთანხმების რატიფიკაციის პროცედურები დაასრულეს. გადაწყვეტილება სტრატეგიული პარტნიორობის შეთანხმების დადების შესახებ საბჭომ 2024 წლის 22 აპრილს მიიღო, დოკუმენტი 1-ელ იანვარს შევიდა ძალაში.