1 იანვარს, დილით, უკრაინამ ევროპაში რუსული გაზის ტრანზიტი შეაჩერა. გაზის ტრანსპორტირების სისტემა მუშაობს არატრანზიტულ რეჟიმში, — ამის შესახებ რუსული მედია, უკრაინის ბუნებრივი აირის გადაცემის სისტემის ოპერატორზე (OHSU) დაყრდნობით, იტყობინება.

2025 წლის 1 იანვარს, კიევის დროით დილის 7:00 საათზე, OHSU-სა და გაზპრომს შორის შეთანხმებას ვადა ამოეწურა. რაც იმას ნიშნავს, რომ 1-ელი იანვრიდან უკრაინის გაზის სატრანზიტო სისტემა რუსული გაზის ტრანზიტის რეჟიმში აღარ მუშაობს.

"უკრაინულმა ბუნებრივი აირის გადაცემის სისტემის ოპერატორმა მოამზადა ინფრასტრუქტურა ნულოვანი ტრანზიტის რეჟიმში მუშაობისთვის და უკრაინელი მომხმარებლებისთვის გაზის საიმედო მიწოდებისთვის. კომპანიის გუნდი მზად არის იმუშაოს ახალ პირობებში", — აღნიშნა OHSU-ს გენერალურმა დირექტორმა დიმიტრი ლიპამ.

კერძოდ, OHSU დათანხმდა გარანტირებული სიმძლავრეების გაზრდაზე, რათა უზრუნველყოს გაზის მიწოდების შესაძლებლობა როგორც უკრაინაში, ასევე უკრაინის გავლით ევროპელი მომხმარებლისთვის.

უკრაინის ენერგეტიკის მინისტრმა, გერმან გალუშენკომ უკრაინის მიერ რუსული გაზის ტრანზიტის შეჩერებას ისტორიული მოვლენა უწოდა.

"რუსული გაზის ტრანზიტი შევაჩერეთ. ეს ისტორიული მოვლენაა. რუსეთი ბაზრებს კარგავს, ფინანსურ ზარალს განიცდის. ევროპამ უკვე მიიღო გადაწყვეტილება რუსულ გაზზე უარი თქვას", — განაცხადა უკრაინის ენერგეტიკის მინისტრმა.