რუსეთის საგარეო საქმეთა სამინისტროს პრესსპიკერი, მარია ზახაროვა აცხადებს, რომ "მოსკოვი უკრაინის გავლით რუსული გაზის ევროპაში ტრანზიტის შეწყვეტაზე პასუხისმგებლობას ვაშინგტონს და კიევს აკისრებს".

მისი თქმით, მიუხედავად იმისა, რომ "გაზპრომი" ხელშეკრულებით გათვალისწინებულ ვალდებულებებს ასრულებს, კიევმა მაინც გადაწყვიტა შეწყვიტოს რუსეთისგან საწვავის დატუმბვა ევროპის ქვეყნების მაცხოვრებლებისთვის.

"კონკურენტული და ეკოლოგიურად სუფთა რუსული ენერგომატარებლების მიწოდების შეწყვეტა არა მხოლოდ ასუსტებს ევროპის ეკონომიკურ პოტენციალს, არამედ ძალიან უარყოფითად აისახება ევროპის მოქალაქეების ცხოვრების სტანდარტზე", — აღნიშნა ზახაროვამ.

რუსეთის საგარეოს პრესსპიკერის თქმით, კიევის გადაწყვეტილების "მთავარი ბენეფიციარი შეერთებული შტატებია".

"რუსული გაზის მიწოდების შეწყვეტაზე პასუხისმგებლობა მთლიანად ეკისრება შეერთებულ შტატებს, მარიონეტულ კიევის რეჟიმს, ისევე როგორც ევროპული სახელმწიფოების ხელისუფლებებს, რომლებმაც თავიანთი მოქალაქეების კეთილდღეობა ამერიკის ეკონომიკის ფინანსურ მხარდაჭერას შესწირეს", — აღნიშნა ზახაროვამ.

შეგახსენებთ, 1-ელი იანვრიდან უკრაინამ საკუთარი ტერიტორიის გავლით რუსული გაზის ევროპაში ტრანზიტი შეწყვიტა.