ცესკო-ს თავმჯდომარის ოპოზიციის კვოტით არჩეული მოადგილის, გიორგი სიორიძის განცხადებით, ცესკო-ს თავმჯდომარისა და წევრების შერჩევის პროცესი 19 აპრილის შეთანხმების სრული იგნორირებით მიმდინარეობს და უკან გადადგმული ნაბიჯია შარშანდელ კონკურსთან შედარებითაც კი. მისი თქმით, პროცესი სრულად დისკრედიტირებულია და შეუძლებელია, ნდობა ჰქონდეს.

"ახლა მიმდინარე პროცესი, უკან გადადგმული ნაბიჯია შარშანდელ კონკურსთან შედარებითაც კი, რადგან ცოტა ხნის წინ პარლამენტმა მხარი დაუჭირა საარჩევნო კანონმდებლობის ცვლილებებს, რომლითაც კანდიდატების კენჭისყრის პროცედურებს შორის ოთხკვირიანი შუალედები გააუქმა. ამით მმართველმა ძალამ აღარ დატოვა სივრცე პოლიტიკური კონსულტაციებისთვის. ეს ნაბიჯი იყო მორიგი დეკლარირება ქართული ოცნების მხრიდან, რომ მათთვის სასურველი კანდიდატების გაყვანას ფორმალური ბარიერებიც კი არ უნდა გადაეღობოს წინ.

ამასთან, განსხვავებით გასული წლისგან, ცესკოს თავმჯდომარეობისა და წევრობის კანდიდატების შესარჩევ საკონკურსო კომისიას ბოიკოტი გამოუცხადეს ისეთი მაღალი ავტორიტეტის მქონე არასამთავრობო ორგანიზაციებმა, როგორებიცაა სამართლიანი არჩევნები, საქართველოს ახალგაზრდა იურისტთა ასოციაცია, საერთაშორისო გამჭვირვალობა და IDFI. შესაბამისად, მიმდინარე შესარჩევი პროცესი მესამე სექტორის მხრიდანაც პრაქტიკულად დისკრედიტირებულია, ვინაიდან ის იმედი, რომელიც შარშან არსებობდა, რომ რეალური ცვლილებების განხორციელება შესაძლებელია, აღარ არსებობს", — ამბობს ის.

17 დეკემბერს საქართველოს პარლამენტმა დაჩქარებული წესით, მესამე მოსმენით რეგლამენტში ცვლილების შეტანის შესახებ კანონპროექტი დაამტკიცა, რომლის მიხედვითაც, ცესკოს თავმჯდომარისა და წევრების არჩევის წესი შეიცვალა. უფრო ზუსტად, გამარტივდა არჩევის პროცედურა

ცესკოს თავმჯდომარისა და ცესკოს ორი წევრის თანამდებობაზე კანდიდატთა შესარჩევად კონკურსი 28 დეკემბერს გამოცხადდა. ამის შესახებ განკარგულება საქართველოს პრეზიდენტმა გამოსცა. ცესკოს მოქმედ თავმჯდომარესა და ცესკოს ორ წევრს უფლებამოსილების ვადა თებერვალში გასდით.

დღეს, 14 დეკემბერს ცესკო-ს თავმჯდომარეობისა და წევრობის კანდიდატებთან ჩატარდა გასაუბრება. თავმჯდომარეობის შესარჩევ კონკურსში 4, ხოლო წევრობაზე 7 კანდიდატია დარეგისტრირებული.