რუსთავი 2-ის ინფორმაციით, იუსტიციის მინისტრის ხელმძღვანელობით მომუშავე კომისიამ მთავრობას ადამიანის უფლებათა ევროპული სასამართლოს მოსამართლეობის 5 კანდიდატი წარუდგინა. დასახელებული კანდიდატებიდან მთავრობამ სამი უნდა შეარჩიოს. მათგან ერთს კი ევროპის საბჭოს საპარლამენტო ასამბლეის დეპუტატები შემოდგომაზე დაამტკიცებენ.

კომისიის მიერ დასახელებული კანდიდატები არიან: ევა გოცირიძე, ანა დოლიძე, გიორგი ბადაშვილი, ნანა მჭედლიძე და ალექსანდრე ბარამიძე.

ადვოკატთა ასოციაციის თავჯდომარის, ზაზა ხატიაშვილის თქმით, ხელისუფლების მხრიდან ევა გოცირიძის კანდიდატურის მხარდაჭერა მიუთითებს იმაზე, რომ ხელისფულება სწორედ გოცირიძის ხელით ლობირებდა იუსტიციის უმაღლეს საბჭოში ლევან მურუსიძის საქმიანობას:

"როდესაც ევა გოცირიძემ მიიღო ხელისუფლებისგან მხარდაჭერა, ეს უკვე იყო იმის დადასტურება, რომ ხელისუფლება ლევან მურუსიძეს ევა გოცირიძის ხელით ლობირებდა".

ხატიაშვილის განცხადებით ის, საიას თავჯდომარესთან ერთად, პრემიერისთვის კანდიდატების არჩევის დეტალების გაცნობას აპირებს. მისი თქმით, იმ შემთხვევაში თუ საქართველოს ხელისუფლება ევროპის სასამართლოში წარდგენილ სამ კანდიდატს შორის ევა გოცირიძეს მოახვედრებს, მაშინ ის სტრასბურგში შიმშილობას დაიწყებს.

საპარლამენტო უმრავლესობის წევრის, ეკა ბესელიას თქმით კი, ევა გოცირიძე ხუთეულში მხოლოდ იმიტომ მოხვდა, რომ მას ევროსასამართლოსთან მუშაობის დიდი გამოცდილება აქვს და ის ადამიანის უფლებების დაცვის კუთხით დაწერილი არაერთი სამეცნიერო ნაშრომის ავტორია.

ნაციონალური მოძრაობის წევრს, დავით დარჩიაშვილს მიაჩნია, რომ მართლმსაჯულების სისტემისადმი ხელისუფლების დამოკიდებულება პოლიტიკურია. მისი თქმით, ეს გამოიხატება, როგორც სასამართლოში მოსამართლეების სხვადასხვა თანამდებობებზე დანიშვნით, ასევე ევროპული სასამართლოსთვის კანდიდატების წარდგენითაც.