ადვოკატ ზვიად კორძაძის განცხადებით, მიუხედავად იმისა, რომ ბადრი ჯაფარიძე გუშინ სასამართლომ დამნაშავედ ცნო, პარლამენტს შეუძლია არ შეუჩეროს დეპუტატის მანდატი. ადვოკატი განმარტავს, რომ ამის საფუძველი თავად სასამართლო გადაწყვეტილებაა, რომელმაც ჯაფარიძე სასჯელის მოხდისგან გაათავისუფლა.

"კონსტიტუციის აღნიშნული მუხლი, თუ შინაარსობრივად გავიზიარებთ, ნიშნავს იმას, რომ ადამიანი, რომელიც მსჯავრდებულია და რომელსაც მისჯილი აქვს გარკვეული სასჯელი, არ შეიძლება იყოს პარლამენტის წვერი, მაგრამ აღნიშნული გადაწყვეტილებით, რომელიც გამოიტანა სასამართლომ ბადრი ჯაფარიძე გათავისუფლებულ იქნა სასჯელის მოხდისგან. მას, ასევე, ნასამართლეობა არ აქვს. შესაბამისად თუ პარლამენტის ამ მუხლს განმარტავს შინაარსიდან გამომდინარე, რისთვისაც იქნა მიღებული, ჩემი აზრით, არ უნდა იქნეს შეჩერებული. დანარჩენი უკვე პარლამენტზე დამოკიდებული", — განაცხადა ადვოკატმა TV პირველთა საუბრისას.

საქართველოს კონსტიტუციის 39-ე მუხლის მიხედვით, პარლამენტის წევრს უფლებამოსილება ვადამდე შეუწყდება თუ სასამართლოს განაჩენით დამნაშავედაა ცნობილია.

გუშინ, 12 იანვარს, მოსამართლე გიორგი არევაძემ ბადრი ჯაფარიძეს, მამუკა ხაზარაძესა და ავთანდილ წერეთელს ე.წ. ფულის გათეთრების საქმეზე მუხლი გადაუკვალიფიცირა და დამნაშავედ თაღლითობაში ცნო. ჯაფარიძეს და ხაზარაძეს სასამართლომ 7-7 წელი მიუსაჯა, თუმცა საქმის ხანდაზმულობის გამო სასჯელი გაუუქმდათ.

იურისტი, საქართველოს დემოკრატიული ინიციატივის (GDI) თავმჯდომარე ედუარდ მარიკაშვილი განმარტავს, რომ ხანდაზმულობის გამო ამ მუხლით გათვალისწინებულ დანაშაულზე პროკურატურა გამოძიებას ვერ დაიწყება. "სამართალი ურმიდან გადმოვარდა" — ასე შეაფასა მან მოსამართლე გიორგი არევაძის გადაწყვეტილება.

"პროკურატურა, სახელმწიფო ბრალმდებელი, ვერცერთ შემთხვევაში შეძლებდა დაეწყო გამოძიება და ხაზარაძე-ჯაფარიძე-წერეთელი თაღლითობაში გაემტყუნებინა. სასამართლომდეც ვერ მიიტანდა საქმეს, ნაბიჯს ვერ გადადგამდა, ამ შედეგს ვერ დააყენებდა.

ამის საპირისპიროდ, მოსამართლე არევაძემ სასწაული შეძლო. თვითონ გამოიტანა ხანდაზმულ "დანაშაულზე" განაჩენი — იმ "დანაშაულზე", რომელზეც გამოძიებაც კი ვერ დაიწყებოდა და შეუძლებელია ვინმეს მიმართ გამამტყუნებელი განაჩენი გამოსულიყო, მოსამართლე არევაძემ სამი ადამიანი დამნაშავედ ცნო", — აცხადებს მარიკაშვილი.

გაიგე მეტი: