კონსტიტუციის პროექტით ქორწინება განსაზღვრულია როგორც კავშირი მხოლოდ ქალსა და მამაკაცს შორის, ხოლო ლგბტ წყვილებს დაქორწინება კონსტიტუციის დონეზე ეკრძალებათ. პროექტი ქართულმა ოცნებამ საკონსტიტუციო კომისიის სამუშაო ჯგუფებში გამართული კონსულტაციების შემდეგ წარადგინა.

მუხლი 28 (ქორწინების უფლება)

  1. ქორწინება, როგორც ქალისა და მამაკაცის კავშირი ოჯახის შექმნის მიზნით, ემყარება მეუღლეთა უფლებრივ თანასწორობასა და ნებაყოფლობას.

  2. სახელმწიფო იცავს ოჯახის კეთილდღეობას. დედათა და ბავშვთა უფლებები დაცულია კანონით.

დღესვე, ადამიანის უფლებებზე მომუშავე არასამთავრობო ორგანიზაციების ნაწილმა ერთობლივი განცხადება გაავრცელა, რომლის თანახმად, ქორწინების აკრძალვის შემთხვევაში, ლგბტ წყვილებს სამოქალაქო პარტნიორობის უფლება უნდა ჰქონდეთ. მათივე აზრით, ქორწინების შესახებ კონსტიტუციის მუხლს უნდა დაემატოს შემდეგი ფორმულირება "თანაცხოვრების სხვა ფორმები რეგულირდება კანონით."

გეი ქორწინების კონსტიტუციური აკრძალვა ქართული ოცნების ერთ-ერთი მთავარი წინასაარჩევნო დაპირება იყო.

აღსანიშნავია, რომ ერთი და იმავე სქესის მქონე პირთა ქორწინება კანონმდებლობით ისედაც აკრძალულია, ხოლო ლგბტ ჯგუფების მხრიდან ქორწინების თანასწორობის მოთხოვნა არასდროს დამდგარა. მიუხედავად ამისა, გასული წლების განმავლობაში თება არა ერთხელ გამხდარა პოლიტიკური მანიპულაციების საგანი.