დეკემბერში წლიური ინფლაცია 13,9% იყო, რაც ბოლო 10 წელში ფასების დონის ზრდის რეკორდულად მაღალი მაჩვენებელია.

ინფლაციის მაჩვენებელზე ყველაზე მეტად სურსათის გაძვირებამ იმოქმედა. ამ სასაქონლო ჯგუფში პროდუქცია წლიურად 15,6%-ით გაძვირდა და იქიდან გამომდინარე, რომ სურსათი ადამიანების სამომხმარებლო კალათის დიდ ნაწილს შეადგენს, მასზე ფასების ზრდამ ინფლაციაში 5,01%-იანი წვლილი შეიტანა.

ინფლაციის მაჩვენებელზე გავლენა მოახდინა 2020 წლის დეკემბერში კომუნალურ გადასახდელებზე არსებულმა სუბსიდიამ. იქიდან გამომდინარე, რომ 2021 წლის დეკემბერში კომუნალური ტარიფები შედარებულია 2020 წლის დეკემბრის სუბსიდირებულ ტარიფებთან, ამან ზრდის შედარებით მაღალი მაჩვენებელი დააფიქსირა.

ასეთია იმ 10 პროდუქტის ჩამონათვალი, რომელიც 2021 წლის დეკემბერში, 2020 წლის დეკემბერთან შედარებით ყველაზე მეტად გაძვირდა:

  1. კომბოსტო — გაძვირდა 199,2%-ით;
  2. წყლის გადასახდელი — გაძვირდა 77,4%-ით;
  3. ბუნებრივი გაზის გადასახდელი — გაძვირდა 76,6%-ით;
  4. ელექტროენერგიის გადასახდელი — გაძვირდა 65,6%-ით;
  5. ნაგვის გატანის გადასახდელი — გაძვირდა 58,1%-ით;
  6. ქლიავი — გაძვირდა 51,5%-ით;
  7. ლურსმანი — გაძვირდა 49,1%-ით;
  8. თერმომეტრი — გაძვირდა 47,5%-ით;
  9. ბენზინი — გაძვირდა 39,9%-ით;
  10. კვერცხი — გაძვირდა 37,6%-ით.

გარდა ამისა, დეკემბერში გაძვირებულია კიდევ 254 დასახელების პროდუქტი და მომსახურება. გაიაფდა 31 დასახელების პროდუქტი, ხოლო 10-ის ფასი უცვლელად დარჩა.

შეგახსენებთ, რომ ნოემბერში წლიური ინფლაცია 12,5% იყო, ოქტომბერში — 12,8%, სექტემბერში — 12,3%, აგვისტოში — 12,8%, ივლისში — 11,9%, ივნისში — 9,9%, მაისში — 7,7%, ხოლო აპრილსა და მარტში — 7,2%.

მაღალი ინფლაციის საპასუხოდ ეროვნულმა ბანკმა გასული წლის დეკემბერში რეფინანსირების განაკვეთი 0,5 პროცენტული პუნქტით, 10,5%-მდე გაზარდა, რის შედეგადაც 170 000-მდე ადამიანს რეფინანსირების განაკვეთზე მიბმული სესხის პროცენტი გაეზარდა.

სებ-ის მიერ დადგენილი ინფლაციის მიზნობრივი, ანუ დასაშვები დონე 3%-ია. ეროვნული ბანკი ინფლაციის მაჩვენებლის დარეგულირებას 2022 წლიდან ელოდება.

გაიგეთ მეტი: