პარტია დროა საქართველოს პრეზიდენტს, სალომე ზურაბიშვილს მოუწოდებს, რომ სახელმწიფო ინსპექტორის გაუქმებაზე, საერთო სასამართლოებსა და ცესკოს თავმჯდომარის არჩევის წესის ცვლილებაზე კანონპროექტებს ვეტო დაადოს. ამის შესახებ პარტიამ განცხადება გაავრცელა, სადაც ნათქვამია, რომ ხელისუფლება არცერთ დამოუკიდებელ ინსტიტუტს თავდასხმის გარეშე არ დატოვებს და შემდეგი, შესაძლოა, ომბუდსმენის აპარატი იყოს.

"საგანგაშოა პარლამენტში დაგეგმილი 3 საკანონმდებლო ცვლილება, რომელთა მიზანი ერთადერთია — სახელმწიფოს მიტაცება ინსტიტუტებზე დაუფარავი თავდასხმის გზით. ხელისუფლება ცდილობს, წინა საახალწლოდ, მათი გადმოსახედიდან პოლიტიკურად არააქტიურ პერიოდში, დაიწყოს შეტევა სამი მიმართულებით: გააუქმოს სახელმწიფო ინსპექტორის აპარატი, გააძლიეროს მოსამართლეებზე რეპრესიები და კვლავ შესაძლებელი გახადოს ცესკოს თავმჯდომარის ერთპიროვნულად 5 წლით არჩევა", — ვკითხულობთ განცხადებაში.

პარტიაში აღნიშნავენ, რომ კანონპროექტები დაჩქარებული წესით და დახურულ კარს მიღმა მომზადდა, რაც მათი თქმით, საზოგადოების ყოველგვარ ჩართულობას გამორიცხავს. დროა მიუთითებს, რომ სახელმწიფო ინსპექტორის სამსახური საერთაშორისო პარტნიორების დიდი ჩართულობისა და ძალისხმევის შედეგად, სამართალდამცავი ორგანოების კონტროლის მიზნით შეიქმნა.

"ხელისუფლებამ ჩათვალა, რომ ახლად შექმნილი ინსტიტუტი ცარიელ ფორმალობად დარჩებოდა, თუმცა სამსახურმა, ლონდა თოლორაიას ხელმძღვანელობით, დისკომფორტი შეუქმნა "ოცნებას". ლექსო ლაშქარავას, ლუკა სირაძისა და ბევრ სხვა მნიშვნელოვან საქმეზე პრინციპული პოზიციის დაფიქსირების შემდეგ, მმართველმა პარტიამ გადაწყვიტა, პირდაპირ გააუქმოს სახელმწიფო ინსპექტორის ინსტიტუტი და მის ნაცვლად, სპეციალური საგამოძიებო და პერსონალურ მონაცემთა დაცვის სამსახურები შექმნას", — ნათქვამია განცხადებაში.

დროა საუბრობს საერთო სასამართლოების შესახებ ორგანულ კანონში შესატან ცვლილებებზეც და აცხადებს, რომ ხელისუფლება ამით მოსამართლეებზე რეპრესიებისა და ცენზურის გაძლიერებას, ფაქტობრივად, აანონსებს.

"უმნიშვნელოვანესია, როგორც პოლიტიკურმა პარტიებმა, ისე საზოგადოებამ გამოვხატოთ მხარდაჭერა იმ 17 მოსამართლის მიმართ, რომლებიც ხელისუფლების მხრიდან მუდმივი წნეხის მიუხედავად, გაბედულად აპროტესტებენ ამ ცვლილებებს", — აცხადებენ დროაში.

მათივე თქმით, საკანონმდებლო ინიციატივა, რომლის მიხედვითაც ცენტრალური საარჩევნო კომისიის თავმჯდომარისა და პროფესიული წევრების არჩევის წესი იცვლება, ფართო კონსენსუსის საჭიროებას გააუქმებს და მმართველ პარტიას გადაწყვეტილების ერთპიროვნულად მიღებას გაუადვილებს.

პარტიის განცხადებით, მიუხედავად იმისა, რომ ვეტოს დაძლევა შესაძლებელია, მსგავსი პოლიტიკური სვლა მკაფიოს გახდის, რომ ერთ მხარეს დარჩენილია "ოცნება", ხოლო მეორე მხარეს ყველა სახელმწიფო ინსტიტუტი.

"არ უნდა დავუშვათ, ამ პროცესმა შეუმჩნევლად ჩაიაროს, ამიტომ ჩვენ, დროა, აუცილებლად შევხვდებით საერთაშორისო პარტნიორებს, რათა კარგად დავანახოთ, რამხელა ნაბიჯები გადაიდგა უკან იმ პროცესში, რომელშიც ამხელა რესურსი და ძალისხმევა ჩადეს", — ვკითხულობთ განცხადებაში.

სახელმწიფო ინსპექტორს, ლონდა თოლორაიას პოზიტიური მოლოდინი აქვს, რომ საქართველოს პრეზიდენტი, სალომე ზურაბიშვილი ინსპექტორის სამსახურის გაუქმების კანონპროექტზე ვეტოს უფლებას გამოიყენებს. მისი თქმით, ეს მოლოდინი აღნიშნულ კანონპროექტზე პრეზიდენტის მიერ გაკეთებულმა განცხადებამ გაუჩინა.

27 დეკემბერს სალომე ზურაბიშვილმა განაცხადა, რომ ინსპექტორის სამსახურის გაუქმებაზე საკითხის დაჩქარებულად განხილვა უნდა შეწყდეს. როგორც პრეზიდენტმა აღნიშნა, არგუმენტებს წარდგენის შესაძლებლობა ყველას უნდა მიეცეს.