პარტია გირჩი — მეტი თავისუფლება იაფი მედიკამენტების შემოტანას და "შმაფთიაქის" გახსნას აანონსებს. ასე გამოეხმაურა პარტია პრემიერმინისტრ ირაკლი ღარიბაშვილს, რომელმაც თქვა, რომ წამლების ფასი თურქეთში უფრო იაფია და აინტერესებს, რატომ.

"შევეცდებით ყველა იმ მოთხოვნის დაკმაყოფილებას, რომელიც სახელმწიფოს აქვს დადგენილი იმისთვის, რომ თურქეთიდან საქართველოში წამლები შემოიტანო და გაყიდო. გაჩვენებთ, სად არის პრობლემა. ძალიან მარტივი საჩვენებელია, რატომ არის შეუძლებელი, თურქეთიდან გადმოიტანო წამლები და გაყიდო აქ", — განაცხადა ზურაბ ჯაფარიძემ.

როგორც პარტიის მიერ გავრცელებულ Facebook-პოსტშია ნათქვამი, რადგან პრემიერმინისტრმა "არ იცის", რატომ არის თურქეთში წამლები უფრო იაფი, ამას აჩვენებენ და თუ პროცესში "სადმე გაიჭედებიან", გაიგებენ, სად არის პრობლემა.

"საქართველოში წამლები ბევრად ძვირი ღირს, ვიდრე თურქეთში. ამის მიზეზი არის სახელმწიფო ბიუროკრატია და არსებული რეგულაციები. დავიწყებთ ყველა იმ მოთხოვნის დაკმაყოფილებას, რომელიც თურქეთიდან წამლის შემოტანისთვისაა საჭირო", — აღნიშნავენ პარტიაში.

პარტიის წევრმა, ნიკა მოსიაშვილმა თქვა, რომ თუ ხელი არ შეუშალეს, დაახლოებით ორ თვეში გახსნიან აფთიაქს, სადაც თურქეთიდან შემოტანილ წამლებს იმაზე იაფად გაყიდიან, ვიდრე დღეს ღირს.

პრემიერმინისტრმა, ირაკლი ღარიბაშვილმა მედიკამენტების ფასებზე 27 დეკემბერს ტელეკომპანია იმედის ეთერში ისაუბრა და აღნიშნა, რომ საქართველოში ის ბევრად უფრო ძვირია, ვიდრე თურქეთში.

"თურქეთიდან დღეს აკრძალული არის რატომღაც წამლების იმპორტი, დავსვი კითხვა, რატომ? პასუხი არავის აქვს, როგორც კი ამ გადაწყვეტილებას მივიღებთ, ეს შეიძლება ძალიან სწრაფი ეფექტი იყოს და მაშინვე შეიძლება გაიაფდეს წამლები, ბუნებრივია, სხვა ღონისძიებებიც გვაქვს დაგეგმილი", — თქვა ღარიბაშვილმა.

მისივე თქმით, მედიკამენტების ფასების შესამცირებლად რამდენიმე ნაბიჯი აქვს დაგეგმილი, თუმცა კონკრეტული მაგალითები არ დაუსახელებია.