საქართველოს მე-4 პრეზიდენტი, გიორგი მარგველაშვილი მე-3 პრეზიდენტთან, მიხეილ სააკაშვილთან შეხვედრის შემდეგ ამბობს, რომ პოლიტიკურად მოტივირებულ საქმეებზე მორატორიუმი უნდა გამოცხადდეს. მისი თქმით, გულისხმობს საქმეებს, რომლებიც საზოგადოების დიდი ნაწილის მიერ პოლიტიკურად მოტივირებულად მიიჩნევა.

"მინდა აღვნიშნო, რომ მიმაჩნია სწორი, რომ ასეთ პროცესში, ვართ რა გადაფასების, ვართ რა იმის გააზრების პროცესში, რომ რაღაცა ყველა პერიოდში მიდიოდა არასწორად და საჭირო იყო იმის გასწორება, აი, ამ კონტექსტში, ჩვენ გადავწყვიტოთ, რომ გარკვეული პოლიტიკური მორატორიუმი გამოვაცხადოთ პოლიტიკურად მოტივირებულ, ჩვენი შეფასებით, პოლიტიკურად მოტივირებულ სასამართლო საქმეებზე. ეს საქმეები არის სააკაშვილი, ეს საქმეები არის ხაზარაძის საქმე, ეს საქმე არის მელია, ეს საქმე არის გვარამია. ანუ, ის საქმეები, რაც საზოგადოებამ თავისთავად იცის, რომ ... მიიჩნევა, [საზოგადოების] დიდი რაოდენობის მიერ მოტივირებულად", — განაცხადა გიორგი მარგველაშვილმა.

მისი თქმით, მორატორიუმის გამოცხადება არ ნიშნავს ვინმეს დამნაშავედ ან უდანაშაულოდ გამოცხადებას. მარგველაშვილი ამბობს, რომ ეს აუცილებელია "გადაფასების და ერთმანეთთან ურთიერთობის პროცესში".

"ეს არ ნიშნავს, რომ ისინი არიან დამნაშავეები ან უდანაშაულოები, ეს ნიშნავს იმას, რომ გადაფასების და ერთმანეთთან ურთიერთობის პროცესში, ჩვენ ამ პროცესს გარკვეულად ვაჩერებთ. შესაბამისად, საუბარი აი ამ მაგიდასთან, სადაც ქართულმა საზოგადოებამ და პოლიტიკურმა სპექტრმა უნდა მოიყაროს თავი, ამ საუბრის წინაპირობა არ შეიძლება იყოს მიმდინარე დევნა ან პატიმრობა ამ საუბრის აქტორებისა.

ყოველგვარი იურიდიული შეფასების გარეშე, უბრალოდ წინაპირობად, ამ ურთიერთობის უნდა იყოს, რომ ყველა ვინც მივუსხდებით ამ მრგვალ მაგიდას და ვისაუბრებთ საქართველოს ერთიან და მთლიან პოლიტიკაზე ისეთ საკითხთან მიმართებაში, როგორიც არის ჩვენი უმთავრესი გეოპოლიტიკური გამოწვევები, ამ ნაწილში ჩვენ ვერ ვიქნებით ზოგი პატიმარი და ზოგი დევნის ობიექტი", — განაცხადა გიორგი მარგველაშვილმა.

გიორგი მარგველაშვილი 20 დეკემბერს მოქმედ პრეზიდენტს, სალომე ზურაბიშვილს შეხვდა. სწორედ ზურაბიშვილთან შეხვედრის შემდეგ მიმართა მან შესაბამის უწყებებს და სააკაშვილთან შეხვედრა მოითხოვა.

სამი პრეზიდენტის შეხვედრის ინიციატორი სწორედ მარგველაშვილია, თუმცა თავდაპირველად ამ იდეის განხორციელება ვერ მოხერხდა. 10 დეკემბერს, მოქმედმა პრეზიდენტმა სალომე ზურაბიშვილი აშშ-ში, დემოკრატიის სამიტზე სიტყვით გამოსვლისას განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. აშშ-ში მყოფ პრეზიდენტს ექსპრეზიდენტი მიხეილ სააკაშვილი გორის სამხედრო ჰოსპიტალიდან გამოეხმაურა და ასევე ყოფილი პრეზიდენტის, გიორგი მარგველაშვილის იდეა შეახსენა.

ამის შემდეგ, 16 დეკემებერს სალომე ზურაბიშვილმა საახალწლო მიღებაზე სპეციალურ საახალწლო მიღებაზე, როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია და ქვეყანაში არსებულ პოლარიზაციაზე ისაუბრა. ზურაბიშვილმა პოლარიზაციის გადაჭრის გზად სწორედ ერთიანი ძალისხმევა დაასახელა. მისი განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

საახალწლო მიღების შემდეგ პრეზიდენტი ეროვნულ თანხმობაზე სასაუბროდ ინდივიდუალურ შეხვედრებს მართავს პოლიტიკოსებთან, რელიგიური კონფესიების წარმომადგენლებთან, არასამთავრობო ორგანიზაციის წარმომადგენლებთან, სახალხო დამცველთან და სახელმწიფო ინსპექტორთან. სწორედ ამ ფორმატში შეხვდა ზურაბიშვილი მარგველაშვილს 20 დეკემბერს.

გაიგე მეტი: