სახალხო დამცველი, ნინო ლომჯარია ამბობს, რომ ეკონომისტ რამაზ გერლიანის საქმეს შეისწავლის. მისი თქმით, გერლიანის საქმეზე შინაგან საქმეთა სამინისტროსთან კომუნიკაცია უკვე ჰქონდა.

"თავდაპირველად ჩვენ გვქონდა ამ საკითხთან დაკავშირებით კომუნიკაცია შსს-სთან, საწყის ეტაპზევე. ამ ეტაპზე დამდგარი მოცემულობა უკვე განსხვავბულია. შესაბამისად, დავინტერესდებით, ცხადია და მოვითხოვთ [ინფორმაციას]", — განაცხადა ნინო ლომჯარიამ.

რამაზ გერლიანი, რომელსაც ოჯახი 19 დეკემბრის შემდეგ ეძებს დღეს, 22 დეკემბერს, გვიან ღამით პოლიციამ იპოვა. მისი თქმით, სურამში იმყოფებოდა და წასვლის მიზეზი პოლიციელის მხრიდან შეურაცხყოფაა.

გაუჩინარების დღეს მან პოლიციის მხრიდან ზეწოლისა და მუქარის შესახებ ფეისბუქზე განცხადება გამოაქვეყნა. გერლიანი წერდა, რომ რადგან ხალხი ამ პოსტს კითხულობს, "მთლად კარგად არ არის საქმე"; ამბობდა, რომ ღირსება შეულახეს და თავს ცუდად გრძნობს. მან გამოაქვეყნა სხვადასხვა დოკუმენტი, მათ შორის, ერთ-ერთი პირის ფეისბუქგვერდის სქრინი და განაცხადა, რომ სწორედ ის ემუქრებოდა, შეიარაღებული დახვდა ბინაში და მიაყენა შეურაცხყოფა.

გერლიანი აცხადებდა, რომ აღნიშნული პირი პოლიციის მუნდირის გამოყენებით, საპოლიციო სისტემითა და სხვადასხვა საშუალებით მასსა და ოჯახის წევრებზე პერსონალურ ინფორმაციას აგროვებდა. გერლიანი ვარაუდობდა, რომ ის ვინმეს დავალებითა ან დაკვეთით მოქმედებდა და მოპოვებულ ინფორმაციას სხვას გადასცემდა. ასევე, წერდა შესაძლო თვალთვალსა და მიყურადებაზეც.

მისივე თქმით, მომხდარზე პოლიციაშიც განაცხადა, თუმცა "კანონი დუმს", ხოლო ინსპექტორის სამსახურმა გამოძიება საერთოდ არ დაიწყო. გერლიანი წერდა იმასაც, რომ განადგურებულია და რაც უნდოდათ, ის მიიღეს, მაგრამ მის მართვას ვერ შეძლებენ.

რამაზ გერლიანის გაუჩინარების საქმეზე გამოძიება სისხლის სამართლის 143-ე მუხლით დაიწყო, რაც თავისუფლების უკანონო აღკვეთას გულისხმობს.