რუსეთის საგარეო საქმეთა მინისტრი, სერგეი ლავროვი აცხადებს, რომ საქართველოს ნატოში "ძალით შეყვანას" ცდილობენ და აღნიშნავს, რომ რუსეთისთვის ეს "წითელი ხაზის დარღვევა" იქნება. ამასთანავე ის იტყუება, თითქოს საქართველოს მოქალაქეების დიდ ნაწილს ეს არ სურს, რასაც არცერთი გამოკითხვა არ ადასტურებს. მეტიც, ავტორიტეტული საერთაშორისო ორგანიზაციების კვლევებით, უმრავლესობა ინტეგრაციის მომხრეა.

რუსეთის სახელწმიფო მედიის, Tass-ის ინფორმაციით, ამის შესახებ ლავროვმა ოკუპირებული სამხრეთ ოსეთისა და აფხაზეთის დე ფაქტო ხელმძღვანელებთან შეხვედრის შემდეგ თქვა. კერძოდ, ის ამტკიცებდა, რომ შეხვედრაზე არ უსაუბრიათ გეოპოლიტიკურ სცენარებზე, მათ შორის, არც "მცდელობებზე, ძალით ჩაითრიონ საქართველო ჩრდილო ატლანტიკურ ალიანსში, მოსახლეობის დიდი ნაწილის სურვილის მიუხედავად".

ლავროვის მტკიცებით, რუსეთი დაინტერესებულია, არ დაუშვას მოვლენების ნეგატიური განვითარება იმ სცენარით, რომელსაც "ნატოს ზოგიერთი სტრატეგია ხატავს".

"ჩვენი პოზიცია ნატოს გაფართოებასთან დაკავშირებით კარგად არის ცნობილი: ეს იქნება წითელი ხაზი, თუ ალიანსი გააგრძელებს უფრო მეტად მოახლოებას რუსეთის ფედერაციის საზღვრებთან", — განაცხადა ლავროვმა.

რუსეთის საგარეო საქმეთა სამინისტრო მოითხოვს, გაუქმდეს 2008 წლის ბუქარესტის სამიტის გადაწყვეტილება, რომლის მიხედვითაც საქართველო და უკრაინა NATO-ში უნდა გაწევრიანდნენ. სერგეი ლავროვის უწყებამ "რუსეთის უსაფრთხოების დაცვის" მოტივით მოთხოვნებით სავსე განცხადება გამოაქვეყნა, რომელშიც დასავლეთი, ყველაზე მეტად კი აშშ და NATO-ს წევრი ქვეყნების არის გაკრიტიკებული.

რუსეთის საგარეო უწყების განცხადებას საქართველოს საგარეო საქმეთა სამინისტრო მიუღებლად მიიჩნევს. საგარეო უწყების განცხადებით, NATO-ში გაწევრიანება საქართველოს სუვერენულ გადაწყვეტილებას წარმოადგენს, რომელიც დაფუძნებულია საქართველოს მოსახლეობის უმრავლესობის ურყევ ნებაზე. აღნიშნული მიზანი ასახულია საქართველოს კონსტიტუციაშიც.

NATO-ს გენერალური მდივნის იენს სტოლტენბერგის განცხადებით, ალიანსის პოზიცია უცვლელი რჩება და ყველა ერს აქვს უფლება საკუთარი გზა აირჩიოს.