პარტია მოქალაქეების ლიდერები, ალეკო ელისაშვილი და ლევან იოსელიანი პრეზიდენტ სალომე ზურაბიშვილს შეხდნენ. იოსელიანის თქმით, განიხილეს, როგორ წარმოუდგენიათ ეროვნული თანხმობის პროცესი.

"ჩემთვის საინტერესო იყო, მას როგორ წარმოუდგენია ეს პროცესი. ყველაზე მთავარი, რაც მომწონს ამ პროცესში და რაც ქალბატონმა სალომემ ისაუბრა, ეს არის, რომ ყველაფერი გავიაზროთ და დავინახოთ ჩვენი განვლილი ისტორიის, ბოლო 30 წლის კონტექსტში — აქედან გამომდინარე გამოვიტანოთ დასკვნები და ვაწარმოოთ ის ახალი პოლიტიკა, რაშიც საქართველოში ყველა პოლიტიკური პარტია და არამარტო პარტიები, საზოგადოებრივი ჯგუფები უნდა იყვნენ ჩართული", — განაცხადა მან.

იოსელიანმა აღნიშნა, რომ პარტიები, რომლებიც სკეპტიკურად არიან განწყობილი ფრთხილად უნდა იყვნენ, რომ პროცესი არ დააზიანონ. მისივე თქმით, მნიშნველოვანია, რომ ყველაფერი წინაპირობების გარეშე იყოს, რადგან ეს არის გამოსავალი.

იოსელიანის განცხადებით, ისაუბრეს საერთაშორისო კონტექსტსა, საქართველოს როლსა და მომატებულ რისკებზე.

"ამიტომ მნიშნველოვანია, რაღაც შიდა საკითხებზე იყოს კონსოლიდაცია, რაზეც ყველანი შევთანხმდებით. რაც შეეხება, პირველ რიგში, ჩვენი ქვეყნის უსაფრთხოებას. ამის შემდეგ მას აქვს, ჩემი აზრით, ძალიან კარგი ხედვა, როგორ შეიძლება ეს პროცესი წავიდეს, ვინ უნდა იყოს მონაწილე და ვფიქრობ, თუ არ შევუშლით ხელს არც მედია, არც პოლიტიკოსები, კარგ შედეგამდე მივალთ საბოლოოდ", — განაცხადა მან.

პრეზიდენტმა პოლიტიკურ პარტიებთან შეხვედრები დაიწყო. დღეს მას უკვე შეხვდა დეპუტატი სალომე სამადაშვილი, ასევე, ენმ-ს წევრი ხატია დეკანოიძე. ახლა რეზიდენციაში იმყოფება გირჩის ლიდერი იაგო ხვიჩია.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.