ოპოზიციონერი დეპუტატი სალომე სამადაშვილი პრეზიდენტ სალომე ზურაბიშვილს შეხვდა. მან შეხვედრას ინტელექტუალური მოთელვა უწოდა და თქვა, რომ საუბარი პოლიტიკურ მართლმსაჯულებას შეეხო. მისივე თქმით, მათ შორის პოლიტიკური ნიშნით არსებულ მიმდინარე საქმეებზეც ისაუბრეს.

"უმთავრესი გამოწვევა ქვეყანაში არის როგორც პოლიტიზირებული მართლმსაჯულება, ასევე, ზოგადად, თამაშის წესები, რომელიც ტოვებს განცდას დიდ ნაწილში საზოგადოების რომ პოლიტიკური თამაშის წესები არის უსამართლო. ამ ეტაპზე შეიძლება ითქვას, მოთელვაა ინტელექტუალური იმისთვის, რომ ჩვენ შევქმნათ პროცესი, რომელიც მართლა იქნება ამ ქვეყნისთვის გამოსავალი", — განაცხადა სამადაშვილმა.

ამ წუთებში პრეზიდენტთან შესახვედრად ოპოზიციის სხვა წარმომადგენლები მიდიან. სალომე ზურაბიშვილს უკვე შეხვდა ნაციონალური მოძრაობის დეპუტატი ხატია დეკანოიძე. მისი თქმით, პირველი შეხვედრისას ერთმანეთს მოუსმინეს და აზრები გაცვალეს.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.