ენმ-ის დეპუტატი ხატია დეკანოიძე აცხადებს, რომ ექსპრეზიდენტ მარგველაშვილის სურვილი, შეხვდეს სააკაშვილს და პრეზიდენტ სალომე ზურაბიშვილის მიერ ცვლილებების დაწყება მნიშვნელოვანია. მისი თქმით, სკეპტიკური მოსაზრებების მიუხედავად, ეს პროცესი დასაწყისშივე არ უნდა დააზიანონ. დეკანოიძემ აღნიშნა, რომ თავად მაქსიმალურად ეცდება შედეგის მიღწევას.

"პრეზიდენტ გიორგი მარგველაშვილის სურვილი შეხვდეს სააკაშვილს, ასევე სალომე ზურაბიშვილის მცდელობა დაიწყოს ცივილიზებული პროცესი — არის მნიშვნელოვანი. სკეპტიკოსების მოსაზრება სრულიად გასაგებია, მაგრამ მნიშვნელოვანია, რომ პროცესი დასაწყისშივე არ დავაზიანოთ და ხელი შევუწყოთ ყველანაირი ფორმით. მაქსიმალურ ძალისხმევას ჩავდებ, რომ ამ პროცესმა მცირე შედეგი მაინც გამოიღოს", — წერს ის.

დღეს ცნობილი გახდა, რომ ყოფილი პრეზიდენტი გიორგი მარგველაშვილი, ზურაბიშვილს შეხვდა და მე-3 პრეზიდენტ სააკაშვილთან შეხვედრასაც ითხოვს. მისივე თქმით, აპირებს დღეს მიმართოს შესაბამის უწყებებს ამ საკითხთან დაკავშირებით.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.