უკრაინის ეკლესიის მეთაური, ეპიფანე აცხადებს, რომ საქართველო ავტოკეფალიას რუსეთის გავლენისა და შანტაჟის გამო არ აღიარებს. ამის შესახებ მან უკრაინულ რადიო თავისუფლებასთან ისაუბრა. მას ეთერში მაყურებელმა გაუგზავნა კითხვა, სადაც ინტერესდებოდა, რატომ არ აღიარებს საქართველო უკრაინის ეკლესიის ავტოკეფალიას.

"ველოდებით. ჩვენ გვაქვს პროგრესი, რეგრესი არ გვაქვს. მაგრამ არის ბევრი მომლოდინე ეკლესია. მართლაც, საქართველოსთან უკრაინას აქვს მეგობრული, კარგი ურთიერთობა. მე ბევრჯერ მსმენია ქართველებისგან კითხვა, რატომ არ აღიარებს მათი ეკლესია უკრაინის ეკლესიის ავტოკეფალიას ამ დრომდე? მაგრამ იქ არის გავლენა, როგორც ჩვენ გვესმის და ვიცით, რუსეთის ფედერაციის, არის ქართული ეკლესიის შანტაჟი — თუ ისინი აღიარებენ უკრაინის ავტოკეფალიას, მათ საბოლოოდ წაართმევენ აფხაზეთს, ანუ უკვე ოკუპირებული ტერიტორიების ნაწილს. ამის გამოა ასეთი ყოყმანი. მაგრამ ეს დრო [ავტოკეფალიის აღიარების] აუცილებლად მოვა. ჯერ მხოლოდ სამი წელი გავიდა. ეკლესიის ისტორიის მიხედვით, ეს ძალიან მოკლე დროა. ჩვენ ვსაუბრობთ ათასწლიან ისტორიაზე, უძველეს ფესვებზე. ამ სამ წელში ისედაც ბევრი გაკეთდა და მომავალში ამ პროცესს აუცილებლად შეუერთდებიან სხვა ეკლესიებიც, რადგან სიმართლე ყოველთვის იმარჯვებს", — თქვა ეპიფანემ.

უკრაინის მართლმადიდებელ ეკლესიას ავტოკეფალია 2019 წლის 6 იანვარს მიენიჭა. მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს, მიტროპოლიტ ეპიფანს ტომოსი გადასცა, რითაც ახალი ეკლესიის შექმნა ფორმალურად დასრულდა.

საქართველოს საპატრიარქომ პოზიციის დაფიქსირებას თავის შეკავება არჩია, თუმცა ეკლესიის წარმომადგენლები ამბობდნენ, რომ ამაზე სინოდის სხდომაზე, ტომოსის წაკითხვის შემდეგ ისაუბრებდნენ. ამ დღის შემდეგ სინოდის სხდომა არაერთხელ ჩატარდა, თუმცა საპატრიარქო ისევ დუმს.