ქართული ოცნების დეპუტატის, არჩილ თალაკვაძის მტკიცებით, ჯანდაცვა მმართველი პარტიის ერთ-ერთი მთავარი მიღწევაა. თალაკვაძე ამბობს, რომ ბოლო წლების მანძილზე, ჯანდაცვის სფეროში ბევრი რეფორმა გატარდა და არაერთი პროექტი განხორციელდა.

კითხვაზე, განიხილება თუ არა ის ეკატერინე ტიკარაძის შემცვლელად ჯანდაცვის მინისტრის პოსტზე, თალაკვაძე ამბობს, რომ ეს მხოლოდ და მხოლოდ პრემიერმინისტრის, ირაკლი ღარიბაშვილის "პრეროგატივაა" და ამაზე, მათი მხრიდან, წინასწარი განცხადებები არ გაკეთდება.

"ბევრი რამ გაკეთდა ჯანდაცვაში და შეიძლება ითქვას, რომ ჯანდაცვა არის ქართული ოცნების ერთ-ერთი მთავარი მიღწევა. შესაბამისად, ჩვენი, როგორც პოლიტიკური გუნდის ინტერესი და ყურადღება ძალიან მაღალია იმ კონსულტაციების მიმართ, რომელიც პრემიერმინისტრთან იმართება ჯანდაცვის ახალი მინისტრის შესარჩევად. მინისტრის წარდგენა, მისი დანიშვნა არის პრემიერმინისტის, ირაკლი ღარიბაშვილის პრეროგატივა, შესაბამისად, ჩვენ, რასაკვირველია, საპარლამენტო გუნდში არ გავაკეთებთ წინასწარ განცხადებებს ამაზე", — თქვა მან იმედის ეთერში.

ჯანდაცვის ჯერ კიდევ მოქმედმა მინისტრმა, ეკატერინე ტიკარაძემ თანამდებობიდან გადადგომის შესახებ 9 დეკემბერს განაცხადა. ამის შესახებ მან ქართული ოცნების ოფისში სპეციალურად გამართულ ბრიფინგზე ისაუბრა. უფრო ზუსტად, ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ სწორად მიიჩნია საქმიანობის პარტიის პოლიტსაბჭოში გაგრძელება. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.

12 დეკემბერს, მისმა მოადგილემ, თამარ გაბუნიამ განაცხადა, რომ ტიკარაძე თანამდებობაზე წლის ბოლომდე იქნება. მანვე აღნიშნა, რომ გადადგომაზე არ იცოდა, თუ ის გადადგომას აპირებდა.

ეკატერინე ტიკარაძისა და პრემიერმინისტრ ირაკლი ღარიბაშვილის შესაძლო დაპირისპირებაზე მედია რამდენიმე დღე აქტიურად საუბრობდა. ამბობდნენ, რომ დაპირისპირება კორონავირუსის მართვაზე განსხვავებულმა ხედვებმა გამოწივია. ამ თემაზე ჯანდაცვის მინისტრს რამდენჯერმე ჰკითხეს, თუმცა ის პასუხს თავს ირიდებდა. გარდა ამისა, მინისტრს ეკითხებოდნენ, იყო თუ არა დაპირისპირების და კამათის მიზეზი მწვანე პასპორტების საკითხი, რაზეც ის ამბობდა, რომ არა დაპირისპირება, არამედ განხილვა ჰქონდათ.

ტიკარაძემ რამდენჯერმე თქვა ისიც, რომ არ ემხრობოდა მთავრობის დაწესებულ უვადო მწვანე პასპორტის იდეას და როგორც ჯანდაცვის სფეროს წარმომადგენელი, ვირუსის მართვის უფრო მკაცრი ზომების მომხრე იყო.