საქართველოს ინოვაციებისა და ტექნოლოგიების სააგენტოს საერთაშორისო დეპარტამენტის ხელმძღვანელის, მარიამ ლაშხის თქმით, 99 პროცენტით მოსალოდნელია, რომ 2017 წლის ბოლომდე, Apple App Store საქართველოსთვისაც გაიხსნება. ლაშხმა On.ge-ს უთხრა, რომ ამის თქმის საშუალებას მას Apple-თან გამართული მოლაპარაკებები და კომპანიისგან მიღებული დაპირება აძლევს.

App Store ეფლის ონლაინ-მაღაზიაა, საიდანაც მომხმარებლებს iOS-ზე მომუშავე მოწყობილობებისთვის, ფასიანი და უფასო აპლიკაციების შეძენა და გადმოწერა შეუძლიათ. სადღეისოდ, App Store მსოფლიოს 155 ქვეყანაშია ხელმისაწვდომი, საქართველო კი მათ სიაში ჯერ არ არის.

ქართული App Store-ის გახსნა ნიშნავს, რომ iPhone, iPad და iPod Touch მოწყობილობების მომხმარებლები, აპლიკაციების მაღაზიის გახსნისას, ჩვენ ქვეყანაზე მორგებულ კონტენტს ნახავენ — იქნება ეს პოპულარული აპლიკაციების სიები თუ თავად ეფლის რჩეული კონტენტი. მთავარი სიახლე კი იქნება ის, რომ App Store-ში აპლიკაციების და სერვისების შეძენა ქართული საბანკო ბარათებით იქნება შესაძლებელი.

დღეს, ამ მაღაზიაში შენაძენის განსახორციელებლად, მომხმარებლებს სხვა და სხვა არასტანდარტული და რთული გზის გამოყენება უწევთ. როგორიცაა, ე.წ. სასაჩუქრე ბარათების შეძენა, რომლითაც საკუთარ Apple-ანგარიშზე ბარათის შესაბამისი ნომინალის თანხა ირიცხება. გადახდების ქართული საბანკო ბარათებით პირდაპირი დაშვება, ამ სერვისს უფრო ხელმისაწვდომს და მარტივად გამოყენებადს გახდის.

App Store-ის ლოკალური ვერსიის არსებობა და ჩვენი ქვეყნის მომხმარებლებისგან გადახდების მიღების გამარტივება, სავარაუდოდ, დამატებით მოტივაციას მისცემს ქართველ დეველოპერებს, შექმნან ადგილობრივ ბაზარზე ორიენტირებული, კომერციული აპლიკაციები, სერვისები და თამაშები.

ინოვაციებისა და ტექნოლოგიების სააგენტოს საერთაშორისო დეპარტამენტის ხელმძღვანელი ამბობს, რომ ამ საკითხზე მოლაპარაკება ეფლთან წლის დასაწყისში დაიწყო, შეხვედრზე კი, კომპანიის წარმომადგენლებს, საქართველოში განხორციელებული რეფორმებისა და გაუმჯობესებული საინვესტიციო გარემოს შესახებ მიაწოდეს ინფორმაცია.

"საკმაოდ მოხიბლულები იყვნენ, არ ელოდნენ საქართველოს მხრიდან ამ გაუმჯობესებას და შეთანხმების საფუძველზე დაგვპირდნენ რომ App Store გაიხსნება საქართველოსთვის. ასევე, სხვა სერვისებთან დაკავშირებით, საქართველოს ჩასვამდნენ პრიორიტეტული ქვეყნების სიაში," - აღნიშნა ლაშხმა.