ნაციონალური მოძრაობის დეპუტატმა მარნეულის საკრებულოს სხდომა პროტესტის ნიშნად დატოვა. მან ბანერი წარწერით: "თავისუფლება მიშას" გაშალა და განაცხადა, რომ საკრებულოს სხდომის ჩასატარებლად, სამართლიანობაა საჭირო.

"ნორმალური საკრებულოს სხდომის ჩატარებისთვის ქვეყანაში უნდა იყოს სამართლიანობა, დავიწყოთ ამით. თავისუფლება მიხეილ სააკაშვილს და სამართლიანი არჩევნები. ეს რომ დღევანდელ სხდომაზე არ არის, ვტოვებ პროტესტის ნიშნად. ეს არის ჩვენი პოზიცია", — თქვა მან.

დეპუტატმა კედელზე სტიკერი, იმავე წარწერით: "თავისუფლება მიშას" მიაკრა და თქვა, რომ ამას საკრებულოს საჩუქრად გადასცემს, საპასუხოდ, ამას პროვოკაცია უწოდეს და ენმ-ის დეპუტატს უთხრეს: "ეგეთი საჩუქრები შეინახეთ თქვენთვის", რის შემდეგაც სტიკერი კედლიდან მოხსნეს და ისროლეს.