თბილისის მერის, კახა კალაძის განცხადებით, დიდ დიღომში საფეხბურთო მოედანთან ერთად რეკრეაციული სივრცე მოეწყობა. დემეტრე თავდადებულის ქუჩის 14 ნომერთან მოსახლეობა სტადიონის მშენებლობას აპროტესტებდა, რადგან საფეხბურთო მოედნის ნაცვლად ისინი სარეკრეაციო სივრვის მოწყობას ითხოვდნენ.

"არიან ადამიანები, რომლებიც ეწინააღმდეგებიან საფეხბურთო სივრცის დიდ დიღომში მოწყობას. ისტორიულად, ამ ტერიტორიაზე სტადიონი არსებობდა, მაგრამ მათი მოთხოვნაა, რომ ამ ადგილზე პარკი გაკეთდეს. 50 მეტრში რეკრეაციული სივრცე უკვე განვაახლეთ, მაგრამ ვითვალისწინებთ მათ სურვილს და საფეხბურთო მოედანთან ერთად რეკრეაციული სივრცეც მოეწყობა", — განაცხადა კალაძემ.

დიდი დიღმის მეორე მიკრორაიონში სტადიონს საქართველოს ფეხბურთის ფედერაცია აშენებს. ფედერაციის ინფორმაციით, პროექტის ფარგლებში, ადგილზე დაგეგმილია ხელოვნურსაფარიანი სტანდარტული ზომის მოედნის მშენებლობა, განათებით, ტრიბუნით და ადმინისტრაციული შენობით.