დიდი დიღმის მე-2 მიკრორაიონში, სადაც ადგილობრივები სარეკრეაციო სივრცის მოწყობას ითხოვენ, ხმაური და დაპირისპირებაა. პოლიციამ აქციის რამდენიმე მონაწილე დააკავა.

On.ge დეტალების გასარკვევად შინაგან საქმეთა სამინისტროს დაუკავშირდა. მათგან პასუხის მიღების შემთხვევაში მასალა განახლდება.

დემეტრე თავდადებულის ქუჩის 14 ნომერთან მოსახლეობა სტადიონის მშენებლობას აპროტესტებს, რადგან საფეხბურთო მოედნის ნაცვლად ისინი სარეკრეაციო სივრვის მოწყობას ითხოვენ. სამუშაოების დასაწყებად დღეს ადგილზე ტექნიკა შემოიყვანეს, რასაც მოქალაქეების პროტესტი მოჰყვა.

ადგილზე სტადიონს საქართველოს ფეხბურთის ფედერაცია აშენებს. მათი განცხადებით, დემეტრე თავდადებულის 14-ის მიმდებარე ტერიტორია სფფ-ს სახელმწიფოსგან საფეხბურთო ინფრასტრუქტურის მოწყობის ვალდებულებით გადმოეცა.

ფედერაციის ინფორმაციით, პროექტის ფარგლებში, ადგილზე დაგეგმილია ხელოვნურსაფარიანი სტანდარტული ზომის მოედნის მშენებლობა, განათებით, ტრიბუნით და ადმინისტრაციული შენობით.

"პროექტის საერთო ღირებულება 2 მილიონ ლარზე მეტია და საქართველოს ფეხბურთის ფედერაციისა და FIFA-ს პროგრამა ფორვარდის თანადაფინანსებით განხორციელდება. საფეხბურთო ცენტრით სარგებლობას სრულიად უფასოდ შეძლებენ ადგილობრივი საფეხბურთო სკოლები, მოყვარულთა და ქალთა კლუბები. ტექნიკური ცენტრის მოვლა-პატრონობას ფეხბურთის ფედერაცია უზრუნველყოფს", — ნათქვამია განცხადებაში.

საქართველოს ფეხბურთის ფედერაციის გეგმის მიხედვით საფეხბურთო ცენტრები თბილისის რამდენიმე უბანში და საქართველოს სხვადასხვა რეგიონში უნდა მოეწყოს.