საქართველოს პარლამენტის დელეგაცია ამერიკის შეერთებულ შტატებში ვიზიტის ფარგლებში კონგრესმენებს, ადამ კინზინგერს, სტივ შაბოს, დევიდ სისილინს და დონ ბეიკონს შეხვდა. პარლამენტის ინფორმაციით, საუბრის ძირითადი საკითები საქართველოს NATO-ში გაწევრიანების დაჩქარება იყო. პარლამენტის წევრებმა ამერიკელ კონგრესმენებს სთხოვეს, რომ ისინი აქტიურად ჩაერთონ საქართველოს ლობირებაში, რათა გაწევრიანების პროცესი მალე დასრულდეს.

"შეხვედრებზე რეგიონში არსებული მძიმე ვითარებასა და უსაფრთხოების საკითხებზე ისაუბრეს. განიხილეს საქართველოს დემოკრატიული განვითარების საკითხები. აღინიშნა, რომ დემოკრატიული რეფორმების მხრივ საქართველო არის ერთ-ერთი გამორჩეული ქვეყანა რეგიონში და რომ საქართველო იმსახურებს შეერთებული შტატების მხარდაჭერას თავისუფლებისთვის და დამოუკიდებლობისთვის გამართულ ბრძოლაში რუსეთის აგრესიული გეგმების წინააღმდეგ", — ნათქვამია პარლამენტის განცხადებაში.

კონგრესმენი დონ ბეიკონი ტვიტერზე წერს, რომ საქართველოს წარმომადგენლებს შეხვდა, რათა სუვერენულ ქვეყნებში რუსეთის ჩარევისგან თავდაცვის სტრატეგიის განეხილათ.

აშშ-ში იმყოფებიან საგარეო ურთიერთობათა კომიტეტის თავმჯდომარე ნიკოლოზ სამხარაძე, თავდაცვის და უშიშროების კომიტეტის თავმჯდომარე ირაკლი ბერაია და საგარეო ურთიერთობათა კომიტეტის თავმჯდომარის პირველი მოადგილე გიორგი ხელაშვილი. შეხვედრას საქართველოს ელჩი აშშ-ში, დავით ბაქრაძეც ესწრებოდა.