ეროვნული ბანკის მონეტარული პოლიტიკის კომიტეტმა რეფინანსირების განაკვეთის 10,5%-მდე გაზრდის გადაწყვეტილება მიიღო, რის შედეგადაც 170 000-მდე მსესხებელს ცვალებად საპროცენტო განაკვეთზე მიბმული კრედიტების პროცენტი 0,5 პროცენტული პუნქტით გაეზარდა. განკვეთის ზრდის გადაწყვეტილება სებ-მა მაღალი ინფლაციის საპასუხოდ მიიღო.

სების გადაწყვეტილებაში ნათქვამია, რომ მომავალ თვეებში ინფლაციის ზრდის დამატებითი ფაქტორი გასული წლის დეკემბერსა და მიმდინარე წლის დასაწყისში კომუნალური სუბსიდირებით გამოწვეული საბაზისო ეფექტი იქნება. აქ იგულისხმება ის, რომ როდესაც ქვეყანაში კომუნალური სუბსიდირება მოქმედებდა, ამან ინფლაციის მაჩვენებელი შეამცირა, რადგან ამ პერიოდში შემცირებული იყო მოსახლეობის ხარჯებიც.

"მოსალოდნელია, რომ შემდგომ თვეებში ინფლაცია, კომუნალური გადასახადების საბაზო ეფექტის გამო, დროებით გაიზრდება, თუმცა გაზაფხულიდან ის შემცირებას დაიწყებს. ინფლაციის ეტაპობრივ შემცირებას, ერთჯერადი ფაქტორების მილევასთან ერთად, დაგეგმილი ფისკალური კონსოლიდაცია და გამკაცრებული მონეტარული პოლიტიკა შეუწყობს ხელს. მომავალში პოლიტიკის განაკვეთის შემცირების წინაპირობა მნიშვნელოვნად შემცირებული ინფლაცია და ინფლაციური მოლოდინები იქნება", — ნათქვამია სებ-ის განცხადებაში.

შეგახსენებთ, რომ ნოემბერში წლიური ინფლაცია 12,5% იყო. სებ-ის გათვლებით, აღნიშნულ ინფლაციაში დაახლოებით 9 პროცენტული პუნქტი საგარეო ფაქტორებით არის გამოწეული. სებ-ში აღნიშნავენ, რომ ამ ფაქტორთაგან მნიშვნელოვანია საერთაშორისო სასაქონლო ბაზრებზე ფართო მოხმარების პროდუქტებზე ფასების ზრდა, რომელიც ადგილობრივ ბაზარს იმპორტირებული ნედლეულისა და პროდუქციის გავლენით გადმოეცემა.

საერთაშორისო სავალუტო ფონდი მიმდინარე წლის ბოლოს ქვეყანაში 13,05%-იან ინფლაციას ელოდება. IMF-ის გათვლებით, ამ მაჩვენებლით საქართველო მსოფლიოში მე-16 ადგილს დაიკავებს.

გაიგეთ მეტი: