ექსპრეზიდენტი, მიხეილ სააკაშვილი აცხადებს, რომ აზერბაიჯანის პრეზიდენტს, ილჰამ ალიევს შეხვდა და ეს "ცოდვა ჩაიდინა", თუმცა ამით საქართველოში გაზის ფასი შეინარჩუნა.

"გაზის ფასი ციდან კი არ ჩამოვარდა, ერთ-ერთი მეზობელი ქვეყნის დელეგაცია იყო ძალიან მაღალი დონის ჩამოსული და არა გასართობად ვიყავით წასული. ისევე, როგორც ჩვენი ძირითადი შეთანხმება, 2008 წელს, როცა ილჰამ ალიევს შევხვდი, გასართობ პროცედურაზე კი არ ვიყავით წასული, ილჰამთან ვიყავი ჩასული და ილჰამმა რა გაგვიკეთა, როდესმე შემდგომში მოვყვები. ერთი წამით რომ არ გაჩერებულა არც ჩვენი ნავთობზე მომარაგება, არც ჩვენი ეროვნული მოარაგება და ა.შ.

დიახ, შევხვდი ილჰამ ალიევს, დიახ, ეს ცოდვა ჩავიდინე და ამაზე უნდა მომისაჯონ, თურმე 11 წელი. სპა რეზორტში ვიყავი, პროცედურებსაც ვიტარებდი, სამაგიეროდ საქართველოს არ ჩაუკეტეს საზღვარი და საქართველოს შეუნარჩუნეს გაზის ფასი, ისე კი არა, ახლა არბიტრაჟი რომ წავაგეთ კალაძის კორუფციული გარიგების შედეგად, სირცხვილი!", — განაცხადა სააკაშვილმა.

თბილისის საქალაქო სასამართლოში, ე.წ პიჯაკების საქმის სასამართლო პროცესი დასრულდა. საქმეს მოსამართლე ბადრი კოჭლამაზიშვილი განიხილავდა. სააკაშვილს ბრალად სამსახურეობრივი მდგომარეობის გამოყენებით, წინასწარი შეთანხმებით, დიდი ოდენობით სახელმწიფო ქონების გაფლანგვა ედება. საუბარია, 9 მილიონ 24 ათას 667 ლარის გაფლანგვაზე. დანაშაული 7-დან 11 წლამდე თავისუფლების აღკვეთას ითვალისწინებს.