აშშ-ის სახელმწიფო მდივნის ყოფილი მოადგილე, დენიელ ფრიდი ამერიკის ხმასთან ინტერვიუში ამბობს, რომ საქართველოს სჭირდება აჩვენოს, ის არაა გახვეული პოსტსაბჭოთა ავტოკრატიაში. ფრიდის შეფასებით, ქვეყანამ უნდა გააგრძელოს რეფორმები და არ აქვს მნიშვნელობა, ქართული ოცნება გააკეთებს ამას, ნაციონალური მოძრაობა თუ ვინმე სხვა.

"საქართველოს მეგობრები ამერიკაში, რომელთა რიცხვიც უზარმაზარია საგარეო ურთიერთობათა წრეებში, შეძრწუნებულები არიან იმით, რასაც საქართველოში გასული წლის განმავლობაში ხედავდნენ, მათ შორის, სხვა საკითხებთან ერთად ეს ეხება სააკაშვილის დაკავებასაც. საქართველო შორდება თავის მეგობრებს, ვის აწყობს ეს? ალბათ, პუტინს, იმიტომ რომ ამას საქართველოს იზოლაციამდე მივყავართ. ევროპელები, რომლებსაც ყოველთვის შერეული დამოკიდებულება ჰქონდათ საქართველოსადმი, ახლა ამბობენ, ჩვენ რატომ უნდა გვადარდებდეს ეს?

საქართველოს სჭირდება, რომ მოიკრიბოს პოლიტიკური კაპიტალი და ეს შეუძლია იმით, რომ დაუბრუნდეს რეფორმების გზას. არ მაინტერესებს ვინ გააკეთებს ამას — ქართული ოცნება, ერთიანი ნაციონალური მოძრაობა თუ ვინმე სხვა. ვფიქრობ, რომ საქართველოს სჭირდება იმის ჩვენება, რომ მას აქვს მომავალი და ის არაა გახვეული პოსტსაბჭოთა ავტოკრატიაში, საითაც, ბევრის აზრით, ქვეყანა მიექანება კიდეც [ამერიკის ხმის თარგმანი]", — ამბობს დენიელ ფრიდი.

საქართველოში მიმდინარე პროცესებს გამოეხმაურა კიდევ ერთი დასავლელი პარტნიორი აშშ-ის ყოფილი ელჩის, იან კელი. მისი თქმით, პრობლემურია, რომ პოლიტიკური დინამიკა ქართულ ოცნებასა და ერთიან ნაციონალურ მოძრაობას შორის დაპირისპირებამდე დადის. იან კელის შეფასებით, ამით სხვა მნიშვნელოვანი პრობლემები იფარება.