Louis Vuitton-ის კაცის ხაზის დიზაინერი და Off-White-ის დამფუძნებელი, ვირჯილ აბლო 41 წლის ასაკში ავთვისებიანი სიმსივნის დიაგნოზით გარდაიცვალა.

აბლოს 2019 წელს გულის ანგიოსარკომას დიაგნოზი დაუსვეს, რომელიც კიბოს იშვიათი და აგრესიული ფორმაა.

"ამ ამბის გამო ყველანი შოკში ვართ. ვირჯილი არა მხოლოდ გენიალური დიზაინერი და საოცარი წარმოსახვის უნარის მქონე ადამიანი, არამედ ბრძენი და ლამაზი სულის პატრონი იყო. LVMH-ის ოჯახი ღრმა მწუხარებას გამოთქვამს და უსამძიმრებს ყველა იმ ადამიანს, რომელმაც ვირჯილის სახით მეუღლე, მამა, ძმა და მეგობარი დაკარგა", — ვკითხულობთ LVMH-ის დირექტორ ბერნარ არნოს განცხადებაში.

აბლო პირველი შავკანიანი ხელოვანია, რომელიც Louis Vuitton-ის არტ-დირექტორი გახდა და ფრანგულ მოდაში ასეთი მაღალი ადგილი დაიკავა, თუმცა მისი სახელი მანამდეც ცნობილი იყო.

ფოტო: Getty Image

აბლომ 2012 წელს დააარსა Off-White, რომელიც როგორც ცნობილი ადამიანების, ისე ახალგარდების საყვარელ ბრენდად იქცა: რიანა, ბიონსე და ჯეი-ზი დიდი ხნის განმავლობაში Off-White-თან თანამშრომლობდნენ. ამასთანავე, Off-White-ის პარტნიორი კომპანიებს შორის იყვნენ Nike, Jimmy Choo და Champion.

აბლოს თავის პროექტებზე მუშაობა არც კიბოს დიაგნოზის დასმის შემდეგ შეუწყვეტია.