მთავარი არხის დაჯარიმების შემდეგ, კომუნიკაციების მარეგულირებელი კომისია ტელეკომპანიას ბულინგსა და მუქარაში ადანაშაულებს. ამასთან აღნიშნავენ, რომ მსგავსი მცდელობები, კანონის აღსრულებას ხელს ვერ შეუშლის და კომისიის გადაწყვეტილებებზე გავლენას ვერ მოახდენს.

კომუნიკაციების კომისიის განცხადებით, "მთავარი არხის მენეჯმენტის მხრიდან ადგილი აქვს საზოგადოების შეცდომაში შეყვანის მცდელობას, თითქოსდა კომისია მთავარი არხის დაჯარიმების შესახებ 2021 წლის 25 ნოემბრის გადაწყვეტილებით სიტყვის და გამოხატვის თავისუფლებას ზღუდავს".

"სიცრუეა არხის ხელმღვანელობის განცხადება, რომ კომისიას არ ჰქონდა არხის დაჯარიმების სამართლებრივი საფუძველი, კატეგორიულად მიუღებელი და დაუშვებელია მთავარი არხის წარმომადგენლების მხრიდან კომისიის წევრებისა და თანამშრომლების მისამართით გაკეთებული მუქარისა და ბულინგის შემცველი განცხადებები. აშკარაა, რომ აღნიშნული კომისიის თანამშრომლების პროფესიულ საქმიანობაში ხელშეშლას და კომისიის, როგორც სახელმწიფო ინსტიტუტის დისკრედიტაციას ემსახურება", — ნათქვამია განცხადებაში.

მათივე თქმით, "მთავარი არხის წარმომადგენლების ქმედებები და განცხადებები შეიცავს კანონით აკრძალული არასათანადო ზემოქმედების მცდელობის ნიშნებს, რაც კატეგორიულად მიუღებელია".

25 ნოემბერს, კომუნიკაციების კომისიამ მთავარი არხი მაქსიმალური სანქციით შემოსავლის 1%-ით, 111, 903, 43 ლარით დააჯარიმა. კომუნიკაციების კომისიის განცხადებით, მაღალი სანქცია მაუწყებლის მიმართ არაწინასაარჩევნო პერიოდში პოლიტიკური რეკლამის ეთერში განთავსების წესის არაერთხელ დარღვევის გამო გამოიყენა.

კოალიცია მედიის ადვოკატირებისთვის განცხადებით, მთავარი არხის სანქცირების ტენდენცია ცენზურის ნიშნებს ატარებს. კოალიციის წევრი ორგანიზაციები კრიტიკული სარედაქციო პოლიტიკის მქონე მაუწყებლის მთავარი არხისა და მისი წარმომადგენლების მიმართ წარმოებულ საქმეებს საგანგაშოდ მიიჩნევენ. მათივე თქმით, სანქცირების ტენდენცია ეჭვებს აჩენს, რომ კომუნიკაციების კომისია მაუწყებლის შეჩერებასა და კრიტიკული სარედაქციო პოლიტიკის შეცვლას ისახავს მიზნად.