მთავრობის მიერ შექმნილი ექიმთა კონსილიუმის წევრის, ენდროკრინოლოგ ელენე გიორგაძის თქმით, ექსპრეზიდენტი მიხეილ სააკაშვილი მას გორის სამხედრო ჰოსპიტალში გაბრაზებული და აფორიაქებული დახვდა. მესამე პრეზიდეტის ჯანმრთელობის მდგომარეობაზე საუბრისას, მან, ასევე, თქვა, რომ პოსტ შიმშილის პერიოდი 99%-თ, მშვიდად ყველანაირი ექსცესების გარეშე გავლილია.

"რა გითხრათ, ექიმი ვარ და მეც შემიძლია გამოვხატო ემოციები. დღეს ჩემი პაციენტი გაბრაზებული და აფორიაქებული დამხვდა. ეს უკვე თქვენ თვითონ გადაწყვიტეთ, რატომ. პაციენტს, რომელსაც ანერვიულებენ, არ ვიცი ტელევიზორით თუ იქ, ეს ჩემი პრობლემა არ არის, რა თქმა უნდა, მე როგორც ექიმი ამაზე ვბრაზდები. ყველას ვთხოვე, მის იურისტებსაც, ამხანაგებსაც, ოჯახის წვერებსაც — ორი კვირა მაცადეთ, რომ ეს ადამიანი დავაყენო [ფეხზე]. თუ მართლა, თქვენ ამ ადამიანზე ზრუნავთ და ზრუნავთ მის სიცოცხლეზე, ცოტა შეეცადეთ და ორი კვირა მოგვეცით ექიმებს, რომ გამოვიყვანოთ ბოლომდე ამ მდგომარეობიდან", — განაცხადა გიორგაძემ.

ენდოკრინოლოგის თქმით, მიხეილ სააკაშვილი ძალიან დამჯერი პაციენტია და ექიმების რეკომენდაციებს იცავს. ის, ასევე, ამბობს, რომ მედიკოსთა რეკომენდაციას თანახმად, პაციენტთან დღეში 3 ვიზიტორზე მეტის შესვლა რეკომენდებული არ იყო. მნახველების ვინაობას თავად საააკშვილი ირჩევდა.

"რაც ამ ადამიანს ინტელექტი და ანალიტიკური ტვინი ჰქონდა, ყველაფერი ადგილზეა. არსებობს კიდევ ასეთი ჯანმრთელობა — მენტალური , როგორც არის სხვა ორგანოები ასევეა მენტალური, ამაზე ლაპარაკობენ, ვარაუდით ვინც ნახა, რომ გლდანის #18 სამკურნალო დაწესებულებაში იყო უკეთესად, თუმცა მე ეს არ ვიცი, მე ამას ვერ შევაფასებ. მე ვარ ენდოკრინოლოგი, მენტალური ჯანმრთრლობის შეფასების კომპეტენცია აქვს მხოლოდ ფსიქიატრს", — აღნიშნა ელენე გიორგაძემ.

19 ნოემბერს იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და შიმშილობა შეწყვიტა.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.