უზენაესი სასამართლოს მოსამართლეობის კანდიდატს, ნინო სანდოძეს საპარლამენტო მოსმენაზე ჰკითხეს, შეუშვებს თუ არა პროცესზე ადვოკატს, რომელსაც ეცმევა მაისური წარწერით — "კლანი უნდა წავიდეს". ეს კითხვა სანდოძეს ორგანიზაცია უფლებები საქართველოს პროექტის კოორდინატორმა, კახა წიქარიშვილმა დაუსვა, რომელსაც თავად ეცვა მაისური იგივე წარწერით.

თავდაპირველად სანდოძემ განაცხადა, რომ "არ ჰგონია" მხოლოდ ეს მაისური გახდეს სხდომიდან გაძევების საფუძველი, თუ მას არ მოჰყვა კიდევ რაიმე განმარტება. შემდეგ დააკონკრეტა, ვინ გულისხმობდა წიქარიშვილი — მხარეს თუ დამსწრეს? დაზუსტების შემდეგ, რომ კითხვა ადვოკატს შეეხებოდა, სანდოძემ განაცხადა, რომ ადვოკატის მხრიდან ეს იქნებოდა მოსამართლეზე ზეგავლენის მოხდენის მცდელობა.

"ადვოკატთან დაკავშირებით, ვფიქრობ, უფრო სხვა რეაქცია მექნება, ვიდრე დამსწრესთან დაკავშირებით. გავმიჯნავ ამ ორ გარემოებას, ვინაიდან თუ ადვოკატი მოდის და რაღაცნაირად მოსამართლეზე გავლენას ახდენს, იცით რას შევადარებ ბატონო კახა? დასავლეთ საქართველოდან მქონია საქმეები, რომლებიც განმიხილავს. პირველი ინსტანციიდან დაზარალებულები მოდიან ხოლმე სასამართლო სხდომაზე, რომლებსაც გარდაცვლილის დიდი სურათი უკავიათ ხელში. აი, ზუსტად ამას ჰგავს. გარკვეულწილად, ზეგავლენის მოხდენას ჰგავს ჩემი აზრით მხარისგან და რაც შეეხება დამსწრისგან, ალბათ დამსწრეს არ გავაძევებდი", — განაცხადა ნინო სანდოძემ.

წიქარიშვილმა მას ჰკითხა, თუ სასამართლოში კლანი არ არსებობს, რატომ არის მისთვის პრობლემური ეს წარწერა.

"პრობლემა არის ის, როდესაც არასწორი ინფორმაცია მკვიდრდება საზოგადოებაში. 4 წელი რომ გაგრძელდეს ის სარეკლამო კამპანია, რომელიც მოსამართლეებზე ახლა მიმდინარეობს, 4 წლის მერე სრულწლოვანს რომ ჰკითხოთ, ყველა ჩათვლის, რომ, ყველა მოსამართლე კლავს. ეს არის ამ პიარკამპანიის შედეგი ჩემი აზრით. იმდენი წელია ისმის ეს განმარტება, თუმცა არანაირი დასაბუთება არ ისმის", — ამბობს სანდოძე.

მეორე დღეა პარლამენტში უზენაესი სასამართლოს მოსამართლეობის კანდიდატებს უსმენენ. აღსანიშნავია, რომ, შარლ მიშელის შეთანხმების ერთ-ერთი მთავარი პუნქტი სასამართლო რეფორმას ეხებოდა. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეეკავებინათ. ამის მიუხედავად, პარლამენტმა სასამართლოს მოსამართლეობის 6 კანდიდატი უვადოდ დაამტკიცა. პარალელურად კი, ქართული ოცნება აცხადებდა, რომ შარლ მიშელის დოკუმენტი მათი მხრიდან სრულდება. იმის საილუსტრაციოდ, რომ შეთანხმებაში ნამდვილად ეწერა უზენაესი სასამართლოს მოსამართლეების დანიშვნებისგან თავის შეკავების შესახებ, ამერიკის საელჩომ ტვიტერზე გამოაქვეყნა დოკუმენტის ფოტო, სადაც შეთანხმების ეს ნაწილი ყვითლად არის გახაზული.

ამის შემდეგ იყო ევროკავშირის წარმომადგენლის განცხადება იმის შესახებ, რომ საქართველომ მაკროფინანსური დახმარების მიღების პირობები ვერ შეასრულა. ჟულიენ კრამპის თქმით, ამ განცხადებამდე ქართული ოცნების ხელისუფლება აქტიურად საუბრობდა იმაზე, რომ ევროკავშირისგან მაკროფინანსური დახმარების მეორე ნაწილზე უარს ამბობენ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა აღარ არის.

ამასთანავე, ეუთოს დემოკრატიული ინსტიტუტებისა და ადამიანის უფლებათა ოფისის (ODIHR) მიერ გამოქვეყნებული ანგარიშის მიხედვით, საქართველოს უზენაესი სასამართლოს მოსამართლეობის კანდიდატების წარდგენის პროცესში გამოვლენილმა ხარვეზებმა ქვეყანაში სასამართლო სისტემის დამოუკიდებლობის საკითხი რისკის ქვეშ დააყენა.