მადრიდის "რეალისა" და საფრანგეთის ეროვნული ნაკრების ცენტრალური თავდამსხმელი, ქარიმ ბენზემა სასამართლომ თავისი კოლეგის, ფრანგი ფეხბურთელის შანტაჟის საქმეში დამნაშავედ ცნო.

ფრანგულმა სასამართლომ ბენზემას ერთწლიანი პირობითი მსჯავრი და ჯარიმის სახით 75 000 ევროს გადახდა მიუსაჯა.

აღნიშნული საქმე 2015 წელს მომხდარ შემთხვევას უკავშირდება, როცა ფრანგი ფეხბურთელის მატიე ვალბუენას მობილურიდან სექსუალური შინაარსის პირადი ჩანაწერები გარკვეულმა პირებმა უნებართვოდ მოიპოვეს და შემდეგ ფეხბურთელს კადრების გავრცელებით აშანტაჟებდნენ.

ქარიმ ბენზემას ბრალი არ ედებოდა მუქარის პირდაპირ ინიციატორობაში, არამედ მოგვიანებით ის ამ მხარეებს შორის "შუამავლის" როლს ასრულებდა: ის მატიე ვალბუენას შეხვდა და როგორც ადვოკატები ცდილობდნენ მისი პოზიციის ახსნას, საქმის "მშვიდობიანად მოგვარება" სურდა.

თუმცა ვალბუენამ სასამართლოს განუცხადა, რომ ბენზემას ტონი "კატეგორიული" იყო და გამომძიებლების თქმით, ბენზემა ცდილობდა, ზეწოლა მოეხდინა ვალბუენაზე, რათა შანტაჟის მეთაურებისთვის ფული გადაეხადა.

ბენზემასთან ერთად ბრალდებულები იყვნენ ჯამში სულ 5 პირი, რომლებიც აცხადებდნენ, რომ მათ ფულის გამოძალვის მიზნით არ მოუპარავთ ვალბუენას მობილურიდან სექსის ჩანაწერები, თუმცა სასამართლომ ხუთივე მათგანი დამნაშავედ ცნო.

ბენზემას ადვოკატები სასამართლოს გადაწყვეტილების გასაჩივრებას აპირებენ.

მადრიდის "რეალს" ან საფრანგეთის ეროვნულ ნაკრებს მომხდართან დაკავშირებით ჯერჯერობით ოფიციალური განცხადება არ გაუვრცელებია. 33 წლის ბენზემა ამ სამართლებრივი სკანდალის გამო საფრანგეთის გუნდიდან დროებით ჩამოშორებული იყო, მაგრამ Euro 2020-სთვის თავის პოზიციას დაუბრუნდა.

მატიე ვალბუენა ამჟამად 37 წლისაა და ბერძნული კლუბის "ოლიმპიაკოს" მოთამაშეა.