სახალხო დამცველი ნინო ლომჯარია მიხეილ სააკაშვილთან შეხვედრის შემდეგ აცხადებს, რომ ექსპრეზიდენტთან შესასვლელად ორი საათი დასჭირდათ. მისი თქმით, ამის მიზეზი სამინისტროებს შორის გართულებული კომუნიკაციაა. ომბუდსმენი ამბობს, რომ უწყებები ერთმანეთში რაღაცებს არკვევენ, თუმცა გაურკვეველია რას.

"ძალიან გართულებულია შესვლა. დაახლოებით 2 საათი მინიმუმ დაგვჭირდა იმისთვის, რომ შესასვლელიდან პაციენტამდე მიგვეღწია. ეს განპირობებულია იმით, რომ რეალურად, გაურკვევლობაა შიგნით, კომუნიკაცია არის გართულებული. კომუნიკაცია არის ჯანდაცვის სამინისტროს, თავდაცვის სამინისტროსა და პენიტენციურ უწყებას შორის და რეალურად, ერთმანეთში რეკავენ და რეკავენ სადღაც, ჩემთვის გაურკვეველია სად და არკვევენ რაღაცებს, რაც ასევე, ჩემთვის არის გაურკვეველი და ამან წაიღო დაახლოებით ორი საათი", — განაცხადა მან.

19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.