ფორმულას მიერ გავრცელებული ვიდეოს თანახმად, ქართული ოცნების დამფუძნებელი ბიძინა ივანიშვილი, რომელიც ბერმუდის სასამართლოში ჩვენებას დისტანციურად აძლევდა, პრემიერმინისტრ ირაკლი ღარიბაშვილზე ამბობს, რომ ის მისთვის ავტორიტეტს არ წარმოადგენდა. ტელეკომპანიის ინფორმაციით, შვეიცარიული ბანკის იურისტმა ივანიშვილს ბევრჯერ ჰკითხა ხელშეკრულების გაფორმებისას რა როლი ჰქონდა ირაკლი ღარიბაშვილს, რომელიც ივანიშვილისა და ბანკის წარმომადგენლების ყველა შეხვედრას ესწრებოდა.

"ერთ პატარა რემარკას გავაკეთებ ღარიბაშვილთან დაკავშირებით... ღარიბაშვილი არ იყო ჩემთვის ავტორიტეტი, ღარიბაშვილი არ იყო ფინანსისტი. თუ Credit Suisse მიმანიშნებდა, რომ ხელი უნდა მომეწერა და ეს ჩემთვის კეთდებოდა, იმას როგორ გადაამოწმებდა ღარიბაშვილი", — ამბობს ივანიშვილი.

ექსპრემიერის თქმით, იმ პერიოდში ღარიბაშვილის ვალდებულება დელეგაციისთვის დროის შეთანხმება, ფულის გადარიცხვა, ზარების განხორციელება, შეხვედრის ორგანიზება და მსგავსი საკითხები იყო.

"თვეში ერთხელ გაეგო, ანგარიშზე რა თანხებია დარჩენილი და ა.შ.", — თქვა ივანიშვილმა.

ამის შემდეგ მას ეკითხებიან: ანუ მდივანივით გყავდათ ღარიბაშვილი? რაზეც ყოფილი პრემიერმისნიტრი პასუხობს: "რაც გინდათ, ის დაარქვით, თქვენ რომელი სახელითაც გინდათ, იმით მოიხსენიეთ".

ამასთან ივანიშვილი ამბობს: "ღარიბაშვილს არ ჰქონდა არც იურიდიული ამის განათლება და, მით უმეტეს, არც ფინანსური".

გამოცემა Bloomberg-მა, ასევე, გამოაქვეყნა სტატია, სადაც მედია წერდა, რომ ივანიშვილი შვეიცარიულ ბანკთან დავის ფარგლებში სასამართლო სხდომას საქართველოდან ესწრებოდა.

გაიგე მეტი: