გამოცემა Bloomberg-ის ცნობით, ქართული ოცნების დამფუძნებელმა, ბიძინა ივანიშვილმა, რომელიც შვეიცარიულ ბანკს Credit Suisse-ს უჩივის, განაცხადა, რომ ბანკთან თანამშრომლობის დროს განცდილ "თავხედობას" არასდროს შეჯახებია.

"ასეთ თავხედობას, რაც Credit Suisse-სთან ურთიერთობის დროს გამოვცადე, საბჭოთა კავშირის დაშლის შემდეგ საქართველოსა და რუსეთში ველური კაპიტალიზმის პირობებშიც არ შევჯახებივარ. არასოდეს მინახავს, რომ სხვაგან კლიენტს ასე ცუდად ეპყრობოდნენ. ეს იმ მასშტაბის შოკი იყო, რომელმაც ჩემი მსოფლმხედველობა შეცვალა", — განაცხადა მან.

ივანიშვილი Credit Suisse Life (Bermuda) Ltd.-ს უჩივის, რადგან მისი თქმით, ბანკმა ვერ შეძლო მათი ბანკირის, პატრის ლესკადრონის თაღლითობის შეჩერება, რამაც ივანიშვილს 400 მილიონი დოლარი დააკარგვინა.

გამოცემის ცნობით, ივანიშვილი ერთ-ერთია იმ, სულ მცირე, 5 ადამიანს შორის, რომლებიც ბანკის წინააღმდეგ დავას აგრძელებენ, მიუხედავად იმისა, რომ ლესკადრონის ბრალი 2018 წელს დაუმტკიცდა. ისინი არ აღიარებენ, რომ ბანკმა ლესკადრონის თაღლითობის შესახებ არაფერი იცოდა.

აღსანიშნავია, რომ როგორც Bloomberg მაისში წერდა, Credit Suisse Group AG ივანიშვილს ბანკირზე ინფორმაციის გასაჯაროების გამო უჩიოდა.

მედიის განცხადებით, პატრის ლესკადრონის საქმე 2015 წელს გახმაურდა, როცა ბანკირმა აღიარა, რომ აყალბებდა ხელმოწერებსა და სავაჭრო ტრანზაქციებს. როგორც Credit Suisse ამტკიცებს, ბანკირი, რომელმაც 2020 წელს სიცოცხლე თვითმკვლელობით დაასრულა, მარტო მოქმედებდა.