ამერიკული დაზვერვის წარმომადგენლები მოკავშირეებს აფრთხილებენ, რომ ცოტა დრო დარჩა, რათა რუსეთს უკრაინაში სამხედრო მოქმედებების განხორციელებაში ხელი შეუშალონ. The New York Times-ის თანახმად, აშშ ევროპულ ქვეყნებს მოუწოდებს შეერთებულ შტატებთან იმუშაონ, რათა მოსკოვის შეკავების მიზნით ეკონომიკური და სამხედრო ზომების პაკეტი შეიმუშაონ.

ამერიკელმა ოფიციალურმა პირებმა განაცხადეს, რომ რუსეთს ჯერ არ გადაუწყვეტია, რას აპირებს უკრაინის მახლობლად დაბანაკებული ჯარით, მაგრამ მობილიზება სერიოზულად განიხილება და შეერთებული შტატები არ თვლის, რომ ეს ბლეფია.

ამერიკული და ბრიტანული დაზვერვა სულ უფრო და უფრო რწმუნდება, რომ რუსეთის პრეზიდენტი ვლადიმერ პუტინი სამხედრო მოქმედებების დაწყებას განიხილავს უკრაინის უფრო დიდ ნაწილზე კონტროლის მოსაპოვებლად, ან ქვეყნის დესტაბილიზაციისთვის, რათა ქვეყნის სათავეში პრორუსული ხელისუფლების მოსვლას შეუწყოს ხელი.

უკრაინის საზღვართან რუსეთის ახალი სამხედრო მობილიზაციის შესახებ გავრცელებული ცნობების ფონზე, აშშ-ის სახელმწიფო მდივანმა, ენტონი ბლინკენმაც კრემლი გააფრთხილა, ახალი შეცდომა არ დაუშვას. ბლინკენის განცხადებით, რუსეთის განზრახვები გაურკვეველია, მაგრამ აღნიშნავს, რომ მოსკოვი მეზობლის წინააღმდეგ ახალი აგრესიის ჩადენით სერიოზულ შეცდომას დაუშვებს.

უკრაინის თავდაცვის სამინისტრომ ნოემბრის დასაწყისში განაცხადა, რომ მის საზღვართან დაახლოებით, 90 000 რუსი ჯარისკაცი გადაისროლეს. გაურკვეველი იყო, რამდენი მათგანი იყო ადგილზე ახლად განლაგებული.

აშშ-მ და მოკავშირე ოფიციალურმა პირებმა განგაში ჯერ კიდევ მიმდინარე წლის აპრილში ატეხეს, როდესაც მოსკოვმა უკრაინის საზღვართან დიდი რაოდენობით სამხედრო ძალა განალაგა.

გაიგე მეტი: