ევროპარლამენტარი, ვიოლა ფონ კრამონი დროას ლიდერის, ელენე ხოშტარიას გადაწყვეტილებას შიმშილობის შეწყვეტასთან დაკავშირებით მიესალმება და ამბობს, რომ ახლა მიხეილ სააკაშვილის ჯერია. ამის შესახებ მან საკუთარ Twitter-ზე დაწერა.

"შვება მომგვარა, რომ ელენე ხოშტარიამ შიმშილობა შეწყვიტა. ძალიან ვღელავდი მის ჯანმრთელობაზე. ახლა სააკაშვილის ჯერია, რომ ამ მაგალითს მიჰყვეს. საქართველოს მთავრობამ დაუყოვნებლივ უნდა გადაიყვანოს ექსპრეზიდენტი შესაბამის სამედიცინო დაწესებულებაში და ოპოზიცია უნდა დარჩეს მშვიდობიანი", — წერს ის.

დღეს, 19 ნოემბერს იუსტიციის მინისტრმა სპეციალურ ბრიფინგზე ექსპრეზიდენტს გორის ჰოსპიტალში გადაყვანა შესთავაზა. მისი მტკიცებით, გორის ჰოსპიტალი არის ადგილი, სადაც მიხეილ სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც მის მიერ იქნება მიღებული გადაწყვეტილება, რომ იგი თანახმაა, გადავიდეს გორის სამხედრო ჰოსპიტალში და შეწყვიტოს შიმშილობა.

რაც შეეხება ჰოსპიტალთან აქციების არგამართვის მოთხოვნას, ამის პირობა ოპოზიციამ ჯერ კიდევ რამდენიმე დღის წინ დადო და თქვა, რომ თუ სააკაშვილს სამოქალაქო კლინიკაში გადაიყვანენ, იქ აქციები არ გაიმართება.

აღნიშნულის შემდეგ, ელენე ხოშტარიამ შიმშილობა შეწყვიტა. ის პარლამენტში 17 დღე შიმშილობდა. მან განაცხადა, რომ შიმშილობას არ შეწყვეტდა მანამ, სანამ სააკაშვილს სამოქალაქო კლინიკაში არ გადაიყვანდნენ.