ჯანდაცვის მინისტრის, ეკატერინე ტიკარაძის განცხადებით, გორის ჰოსპიტალი სრულადაა აღჭურვილი და მწყობრშია მაგნიტურ-რეზონანსული ტომოგრაფიც. მისი თქმით, პაციენტს ყველა საჭირო სერვისი მიეწოდება.

"გორის ჰოსპიტალი არის სრულად აღჭურვილი ყველ იმ მატერიალურ ტექნიკური ბაზით, რომელიც ესაჭიროება პაციენტს. გავრცელებული ინფორმაცია იმის შესახებ, რომ MRI-ს აპარატი გამოსულია მწყობრიდან, არ შეესაბამება სიმართლეს. ის ტექნიკურად გამართულია, მიმდინარეობს პროგრამული აფდეითი და პაციენტს მიეწოდება აუცილებლად ყველა ის სერვისი, რომელიც მას დასჭირდება, შეუფერხებლად", — თქვა ტიკარაძემ.

ტიკარაძემ ასევე თქვა, რომ გორის ჰოსპიტალში სააკაშვილის უსაფრთხოება მაქსიმალურად უზრუნველყოფილი იქნება.

დღეს, 19 ნოემბერს იუსტიციის მინისტრმა სპეციალურ ბრიფინგზე ექსპრეზიდენტს გორის ჰოსპიტალში გადაყვანა შესთავაზა. მისი მტკიცებით, გორის ჰოსპიტალი არის ადგილი, სადაც მიხეილ სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც მის მიერ იქნება მიღებული გადაწყვეტილება, რომ იგი თანახმაა, გადავიდეს გორის სამხედრო ჰოსპიტალში და შეწყვიტოს შიმშილობა.

აღსანიშნავია, რომ მიხეილ სააკაშვილი გორის ჰოსპიტალს საფრთხედ მიიჩნევ. ამაზე ის 11 ნოემბერს გამოქვეყნებულ წერილში წერდა. საფრთხის მიზეზად ის რამდენიმე კილომეტრში საოკუპაციო ხაზისა და სპეცდანიშნულების დანაყოფები ყოფნას ასახელებს.

რაც შეეხება ჰოსპიტალთან აქციების არგამართვის მოთხოვნას, ამის პირობა ოპოზიციამ ჯერ კიდევ რამდენიმე დღის წინ დადო და თქვა, რომ თუ სააკაშვილს სამოქალაქო კლინიკაში გადაიყვანენ, იქ აქციები არ გაიმართება.