გირჩი — მეტი თავისუფლების ლიდერის, ზურაბ ჯაფარიძის განცხადებით, პრეზიდენტ სალომე ზურაბიშვილს სინამდვილეში, "ცალ ფეხზე ჰკიდია" რა ხდება ამ ქვეყანაში. მისი თქმით, ის მთავარი რაღაცებიდან ყურადღების გადატანას ახერხებს და თამაშობს როლს, რომ "თითქოს მართლა პრეზიდენტია და რაღაცებით არის შეწუხებული".

"სინამდვილეში, კადრებში მთავარი პრობლემა არის ის, როგორ ექცევიან მესამე პრეზიდენტს და არა ის, რომ კადრები გასაჯაროვდა. მაგრამ მან მოახერხა და ბრიფინგზე ყურადღება გადაიტანა იმაზე, რომ თითქოს, კადრების გასაჯაროება არის პრობლემა და არა ის, რაც სინამდვილეში დამართეს მესამე პრეზიდენტს, არა ის, რომ მას სინამდვილეში ართმევენ უფლებას, თავის სასამართლოზე წარდგეს, არა ის, რომ ის იძულებით გადაიყვანეს — რისი უფლებაც არ ჰქონდათ — ერთიდან მეორე დაწესებულებაში. ეს ყველაფერი თითქოს არაფერია და თითქოს, კადრების გასაჯაროებაა პრობლემა.

მთავარი რაღაცებიდან ახერხებს ყურადღების გადატანას რაღაცაზე და იმ რაღაცაზე თითქოს კრიტიკულია ხოლმე. მერე ეს იწვევს რიგ ადამიანებში, ჩემდა გასაოცრად, ჩემ გარშემოც კი, იმ ადამიანებში, ვისაც აზრი მოეკითხებათ, სიხარულსა და ხანდახან აღფრთოვანებასაც კი — რომ პრეზიდენტმა, აი, ამოიღო ხმა. მე არ მჯერა ეგეთი რაღაცები და გავიმეორებ, ის თამაშობს იმავეს თამაშს, რა თამაშსაც თამაშობს ივანიშვილის სხვა ფიგურები, რომლებიც მან სხვადასხვა პოზიციაზე, სხვადასხვა ძალაუფლების წერტილებზე დასვა. მას ეს როლი აკისრია, რომ ითამაშოს ეს როლი, რომ თითქოს ის მართლა პრეზიდენტია, თითქოს, მართლა რაღაცებით არის შეწუხებული. სინამდვილეში, სულ ცალ ფეხზე ჰკიდია რა ხდება ამ ქვეყანაში", — განაცხადა მან TV პირველის ეთერში.

ექსპრეზიდენტის შიმშილობის 48-ე დღეს მოქმედმა პრეზიდენტმა ბრიფინგი გამართა და განაცხადა, რომ სააკაშვილი ჩვეულებრივი პატიმარი არ არის და როგორც სხვა პატიმრები, ვერ ისარგებლებს სამოქალაქო კლინიკით, რადგან ეს შესაძლო საფრთხეებთან არის დაკავშირებული რისი დაზღვევაც მისი აზრით, ურთულესია.

მანვე აღნიშნა, რომ ქვეყნის სახე იმაში გამოიხატება, თუ როგორ მოეპყრობიან პატიმრობაში მყოფ ექსპრეზიდენტს და ხაზი გაუსვა, რომ სააკაშვილის ღირსება დაცული უნდა იყოს "მისივე ქცევის მიუხედავად".

მან კატეგორიულად მიუღებელი უწოდა ღირსებისა და პატივის შემლახავი კადრების გავრცელებას და მმართველი გუნდის რიტორიკა გააკრიტიკა. მისი თქმით, ზოგიერთი ოფიციალური პირის გაკეთებული გამომწვევი განცხადებები საზოგადოებაში მეტ გაუგებრობას, დაძაბულობასა და გაღიზიანებას იწვევს და ამ ვითარებაში კომენტარები მოზომილი უნდა იყოს.

ზურაბიშვილმა სამწუხაროდ შეაფასა ის, რომ ექსპრეზიდენტ მიხეილ სააკაშვილის ჯანმრთელობის მდგომარეობის გამო შექმნილ კონსილიუმს მუშაობის გაგრძელების შესაძლებლობა არ მიეცა.

გაიგეთ მეტი: