მიხეილ სააკაშვილის პირად ექიმს, ნიკოლოზ ყიფშიძეს ექსპრეზიდენტის სანახავად ისევ არ უშვებენ. ის ამ წუთებში ციხის საავადმყოფოსთან ელოდება ნებართვას, რათა პაციენტი მოინახულოს. როგორც ყიფშიძე განმარტავს, არშეშვების მიზეზად სახალხო დამცველისა და მის მიერ შემქნილი ექსპერტთა ჯგუფის სააკაშვილთან შეხვედრა დაუსახელეს.

"დაახლოებით ერთი საათია აქა ვარ უკვე, გარე შლაგბაუმთან ველოდებოდი, მითხრეს მოიცადეო. მერე მითხრეს, ახლა მოიცადე, სახალხო დამცველი შედისო და თქვენ მერე შეგიშვებთო. მთელი ინტერესი ჩემი იყო ის, რომ კონსილიუმს შევხვედროდი და ერთად გვენახა [...] როგორც ყოველთვის ველოდები. დღეს ნამდვილად მინდა, რომ ვნახო პრეზიდენტი. აქედან მე არ წავალ, თუ არ ვნახე პრეზიდენტი", — განაცხადა ყიფშიძემ.

ციხის საავადმყოფოში სახალხო დამცველი, ნინო ლომჯარია და მისი ინიციატივით შემქნილი ექიმთა 7-კაციანი ჯგუფი მივიდნენ. ისინი უკვე შევიდნენ პენიტენციური სამსახურის მე-18 დაწესებულების ტერიტორიაზე, თუმცა ჯერჯერობით უცნობია, მისცემენ თუ არა მათ სააკაშვილის მონახულების უფლებას.

აღსანიშნავია, რომ ნიკოლოზ ყიფშიძე ციხის საავადმყოფოში გუშინაც არ შეუშვეს. გვიან ღამით გლდანის დაწესებულებასთან მისულ ექიმს რამდენიმე წუთით ადრე შეატყობინეს, რომ ის სააკაშვილის სანახავად ვერ შევიდოდა. მისი თქმით, მიზეზები არ განუმარტავთ და უთხრეს, რომ მომდევნო დღეს მოსულიყო.

დღეს, იუსტიციის მინისტრმა, რატი ბრეგაძემ განაცხადა, რომ მიხეილ სააკაშვილის გვიანობამდე დეპუტატები ჰყავდა სტუმრად და ამის შემდეგ, შესაძლოა, მას ეძინა. ასე ახსნა მან ყიფშიძის არშეშვება ექსპრეზიდენტთან.