ექსპრეზიდენტ მიხეილ სააკაშვილის პირადი ექიმი ნიკოლოზ ყიფშიძე სააკაშვილის მოსანახულებლად არ შეუშვეს. ყიფშიძის თქმით, მას 5 წუთის წინ შეატყობინეს, რომ დღეს მისი შესვლა არ მოხდება.

"მითხრეს, მობრძანდით ხვალ. მიზეზს არ მეუბნებიან. [ხვალ] თუ შემიშვებენ, შევალ. აგერ არის ქალბატონი თინა, იყო შესული. მას არ უშვებდნენ გარეთ, მე არ მიშვებდნენ შიგნით. უკვე შეიძლება ეჭვიანობა დავიწყო, რადგან მე გუშინ უნდა შევსულიყავი უკან კონსილიუმთან ერთად, იმიტომ, რომ ბატონი პრეზიდენტი ვნახე ზუსტად 5 წუთი. იმიტომ ვნახე 5 წუთი, რომ ვუთხარი ახლა გავალ და შემოვალ კონსილიუმთან ერთად, მაგრამ ეს არ მოხდა, როგორც ნახეთ", — განაცხადა ყიფშიძემ ჟურნალისტებთან.

მიხეილ სააკაშვილი 47-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ ის გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

სააკაშვილის სამოქალაქო კლინიკაში გადაყვანის მოთხოვნით პეტიციაც შეიქმნა. ხელმომწერები პირობას დებენ, რომ იქამდე, სანამ სააკაშვილი ამ კლინიკაში იქნება, ტერიტორიასთან აქციას არ გამართავენ.