ნაციონალური მოძრაობის თავმჯდომარე, ნიკა მელია ექსპრეზიდენტის სამოქალაქო კლინიკაში გადაყვანის შემთხვევაში ექსცესების თავიდან აცილების მიზნით მთავრობას ჯგუფის ჩამოყალიბებას სთავაზობს. მელიას თქმით, ჯგუფი მიხეილ სააკაშვილის პირადი ექიმით, ოჯახის წევრით, ადვოკატით, ენმ-ის წევრითა და სამოქალაქო საზოგადოების ნდობით აღჭურვილი პირით უნდა იყოს დაკომპლექტებული.

"კიდევ ერთხელ ვადასტურებთ, რომ არანაირი საპროტესტო აქცია არ გაიმართება სამოქალაქო საავადმყოფოსთან. მეტიც, მე ვთავაზობ შესაბამის უწყებას, რომ ჩამოაყალიბოს ჯგუფი, სადაც შევლენ მიხეილ სააკაშვილის პირადი ექიმი, მიხეილ სააკაშვილის ადვოკატი, მიხეილ სააკაშვილის ერთი ოჯახის წევრი, ნაციონალური მოძრაობის ერთი წარმომადგენელი, სამოქალაქო საზოგადოების ერთი მაქსიმაურად მაღალი ნდობით მოსარგებლზე წევრი, რათა ყველა დეტალი მიხეილ სააკაშვილის ტრანსპორტირებასთან დაკავშირებით, სამოქალაქო საავადყოფიში გავიაროთ, რომ თავიდან ავირიდოთ მაქსიმალურად ყველა გაუგებრობა და ექსცესი", — აცხადებს მელია.

მან ხელისუფლებას მიმართა და აღნიშნა, რომ ადამიანის გადასარჩენად დრო კიდევ აქვთ და თუ სააკაშვილი მრავალპროფილურ კლინიკაში არ იქნება გადაყვანილი, პროტესტი ბევრად მწვავე, თუმცა მშვიდობიანი იქნება.

"თქვენ გაქვთ ძვირფასო ხელისუფლების წარმომადგენლებო დრო იმისათვის, რომ გადაარჩინოთ ადამიანი, რომელსაც თქვენ კლავთ, წინააღმდეგ შემთხვევაში ვთქვი ბევრჯერ და ვიმეორებ, საპროტესტო აქცია გახდება უმწვავესი, მაგრამ იქნება არაძალადობრივი, ისეთი როგორიც თქვენ ჯერ არ გინახავათ. არავინ არ შეეგუება ამ ქვეყანაში ჩვენს თვალწინ, ჩვენი უმოქმედობით, თქვენი გეგმით, ვაყურებინოთ ქვეყნის მესამე პრეზიდენტის მკვლელობას", — თქვა მან.

ექსპრეზიდენტი უკვე 45-ე დღეა შიმშილობს. როგორც გუშინ, ღამით მისმა ექიმმა, ნიკოლოზ ყიფშიძემ განაცხადა, სააკაშვილს ძლიერი სისუსტე აქვს და დღეს პირველი დღეა, როცა ფეხზე ვერ ადგა.

ექსპრეზიდენტი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — სამოქალაქო კლინიკის ნაცვლად ის გლდანის ციხის სამკურნალო დაწესებულებაში გადაიყვანეს, სადაც იძულებით შეიყვანეს. სააკაშვილი იქ მკურნალობაზე უარს ამბობს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

სააკაშვილის სამოქალაქო კლინიკაში გადაყვანის მოთხოვნით პეტიციაც შეიქმნა. ხელმომწერები პირობას დებენ, რომ იქამდე, სანამ სააკაშვილი ამ კლინიკაში იქნება, ტერიტორიასთან აქციას არ გამართავენ.