ექსპრეზიდენტის ადვოკატის, შოთა თუთბერიძის განცხადებით, ინფორმაცია, თითქოს მიხეილ სააკაშვილი ეწინააღმდეგებოდა კონსილიუმის შესვლას, სიმართლეს არ შეესაბამება. მისივე თქმით, კონსილიუმს უკვე აცნობეს და მათ ვიზიტს დღესვე ელოდებიან.

"სააკაშვილი ცხადია ითხოვს პარიტეტული კონსილიუმის დაუყოვნებლივ ფორმირებას და რაც შეიძლება სწრაფად შესვლას ციხეში, თუმცა ის არ ეწინააღმდეგება არცერთი წუთით ამჟამად არსებული კონსილიუმის ვიზიტს. მზად არის შეხვდეს მათ, როგორც მთლიანი კონსილიუმის შემადგენლობას, ასევე ინდივიდუალურად", — განაცხადა მან.

გარდა ამისა, ადვოკატის თქმით, მას შემდეგ, რაც გავრცელდა ინფორმაცია, რომ ციხის დირექტორს, შესაძლოა, კორონავირუსი ჰქონდეს, იქ სააკაშვილის დარჩენა უფრო სახიფათო გახდა. რამდენიმე მედიასაშუალებამ ამაზე მას შემდეგ დაიწყო საუბარი, რაც ცნობილი გახდა, რომ დეკანოზ გიორგი მამალაძეს, რომელიც ამ დაწესებულებაში იყო, კორონავირუსი დაუდასტურდა. მისი ძმის, თორნიკე მამალაძის განცხადებით, დეკანოზი იზოლირებული იყო სხვა პატიმრებისა და მნახველებისგან და სავარაუდოა, რომ ვირუსი ციხის თანამშრომელმა გადადო.

დღეს, 14 ნოემბერს დროას ლიდერმა, მოშიმშილე ელენე ხოშტარიამ მიმართა კონსილიუმის წევრ ექიმებს, სააკაშვილის სანახავად ციხეში საკუთარი ინიციატივით შევიდნენ. გუშინ 13 ნოემბერს კი ცნობილი გახდა, რომ სააკაშვილი მოითხოვს, სახალხო დამცველს ეგიდით შეიქმნას კონსილიუმი პარიტეტულ საწყისებზე.