დროას ხელმძღვანელი, ელენე ხოშტარია მოუწოდებს ყველა ექიმს, ჩაერთონ მიხეილ სააკაშვილის მდგომარეობის გაგებისა და მკურნალობის პროცესში. ასევე, ის მოუწოდებს კონსილიუმის წევრებს, პენიტენციური სამსახურის მოთხოვნის გარეშე შევიდნენ ექსპრეზიდენტთან და საზოგადოებას გააგებინონ, რა მდგომარეობაშია ის.

"მხოლოდ და მხოლოდ იმიტომ ვაძლევ თავს უფლებას, ჩავერიო სხვის პროფესიაში და გავბედო, მივმართო ექიმებს, რომ მე თავად მე-12 დღეა ვშიმშილობ. ალბათ ყველას გვესმის, რომ ის კრიზისი, რომელიც არის ქვეყანაში, აბსოლუტურად ცდება არამხოლოდ პარტიულ, არამედ პოლიტიკურ ჩარჩოებს, ეს არის კრიზისი, რომელიც ეხება ყველა მოქალაქეს, კრიზისი, რომელიც ეხება აბსოლუტურად ყველა პროფესიას", — განაცხადა მან.

ხოშტარია განმარტავს, რომ ცნობები, რომლებიც ბოლო დღეებში ექსპრეზიდენტის ჯანმრთელობაზე ვრცელდება საგანგაშოა და პენიტენციური სამსახურის განცხადებები, მათ ვერ ამშვიდებს. სწორედ ამიტომ მან მოუწოდა კონსილიუმის წევრ ნევროლოგს — ალექსანდრე ცისკარიძეს, კრიტიკული მედიცინის წევრს — გიორგი გოცაძეს, ენდოკრინოლოგს — ელენე გიორგაძეს, ჰემატოლოგს — ნინო შარაშენიძეს, რომ შევიდნენ სააკაშვილის სანახავად.

"ჩემი ძალიან დიდი პატივისცემით და მოწიწებით, მინდა მივმართო კონკრეტულად ექიმებს, ყველა ექიმს, ვისაც შეუძლია გამოიჩინოს ინიციატივა და ეცადოს, ჩაერთოს მიხეილ სააკაშვილის მდგომარეობის გაგებისა და მკურნალობის პროცესში და კონკრეტულად, ასევე, იმ ექიმებს, რომლებიც შედიოდნენ კონსილიუმში და რომლებსაც აქვთ გარკვეული ინსტიტუციური ბერკეტი, რომ ჩაერიონ სიტუაციაში. [...]

კიდევ ერთხელ ვიხდი ბოდიშს, რომ ვერევი სხვა პროფესიის და სხვა ინსტიტუტების საქმიანობაში. ერთადერთი რაც მე მამოძრავებს, ეს არის საზოგადოებრივი გარკვეული სიცხადის შემოტანა", — განაცხადა მან.

ხოშტარიამ მადლობა გადაუხადა ექიმებს, რომლებიც მისი ჯანმრთელობის მდგომარეობაზე ზრუნავენ.

"დავამატებ, რომ ძალიან პრინციპულად, მყარად, მხნედ და შეუპოვრად ვაგრძელებ შიმშილობას, სანამ მიხეილ სააკაშვილი არ იქნება გადაყვანილი სამოქალაქო კლინიკაში", — განაცხადა მან.