მიხეილ სააკაშვილის ადვოკატის, ნიკა გვარამიას განცხადებით, ექიმებთან ერთად მოითხოვენ, რომ სახალხო დამცველის ეგიდით შეიქმნას პარიტეტული კონსილიუმი, რომელშიც მათი მხრიდან 8 ექიმი შევა. ასევე, გვარამია მიმართავს ჯანდაცვისა და იუსტიციის სამინისტროს, რომ წარადგინონ ჯგუფი 8 ექიმით და აღნიშნავს, რომ ომბუდსმენს თავადაც შეუძლია წარმომადგენლების ჩართვა, თუ ამას საჭიროდ მიიჩნევს.

"მივმართავთ ჯანდაცვის და იუსიტიციის სამინისტორს, თუ ამას კიდევ აზრი აქვს, მაგრამ ჩვენ სამართლებრივადაც ვალდებული ვართ, ეს მიმართვას გავაკეთოთ. იმედს ვიტოვებთ-თქო ვერ გეტყვით, მაგრამ პასუხს ველოდებით მათგან, რომ წარმოადგინონ სახალხო დამცველის ეგიდით შექმნილ კომისიაში პარიტეტს თუ ვიძახით 8 წევრი. ჩვენ ვენდობით სრულად იმ შემადგენლობას დღეს არსებული კომისიის, რომელიც რეალურად დღეს არ მოქმედებს, სახელწმიფოს განსასაზღვრია, იგივე სპეციალისტებით დაკომპლექტდება მათი მხრიდან, თუ შეცვლიან", — განაცხადა მან.

მანვე აღნიშნა, რომ 8 ექიმმა დღეს სააკაშვილის მდგომარეობაზე ახალი დასკვნა გამოაქვეყნა და მოუწოდებს სახალხო დამცველს, გაითვალისწინოს ეს დაკსვნა და მისი ხელმომწერები შეიყვანოს პარიტეტულ კომისიაში. მისი თქმით, ესენი არიან:

• გიორგი ვერულავა — ექსპერტი ფსიქიატრი;
• კახაბერ მიქაძე — ექსპერტი ფსიქოლოგი;
• ოთარ თორიძე — ექსპერტი ნევროლოგი;
• ლალი ჯავაშვილი — ექსპერტი ენდოკრინოლოგი;
• მარინე აბაშიძე — ექსპერტი ჰემატოლოგი, ტრასფუზიოლოგი;
• ლევან ბესელია — ექსპერტი გადაუდებელ მედიცინაში, ანესთეზიოლოგ-რეანიმატოლოგი;
• მარიამ ჯიშკარიანი — შემთხვევის სუპერვაიზორი და ექსპერტ ჯგუფის ხელმძღვანელი;
• ნიკოლოზ ყიფშიძე — ექსპრეზიდენტის პირადი ექიმი.

რაც შეეხება დასკვნას, მარიამ ჯიშკარიანის განცხადებით, ძირითადი დებულება არის ის, რომ შეუძლებელია შიმშილობის შეწყვეტა იმ დაწესებულებაში, სადაც სააკაშვილი იმყოფება და ეს უნდა მოხდეს მულტიპროფილურ კლინიკაში, სადაც იქნება მკურნალობა-რეაბილიტაციის ადეკვატური პირობები.

"ეს განპირობებულია იმით, რომ რეფიდინგის სინდრომს, შესაძლოა, მოჰყვეს სერიოზული გართულებები, პრაქტიკულად ყველა ორგანოთა სისტემის, განსაკუთრებით, გულ-სისხლძარღვთა სისტემის მხრივ, ასევე, სასუნთქი სისტემის და სხვადასხვა ორგანოს მხრივ. ეს გართულებები, შესაძლოა, იმდენად რთული იყოს, რომ მყისიერად დადგეს სიკვდილი. შესაბამისად, შეუძლებელია აღნიშნულ დაწესებულებაში, სადაც ის იმყოფება ამგვარი მკურნალობის, რეფიდინგის გართულების პრევენციის შესაძლებლობები", — განაცხადა მან.

ადვოკატები მოითხოვენ, რომ წამების საწინააღმდეგო კომიტეტის ნაციონალური მექანიზმის, სახალხო დამცველის წარმომადგენელი შევიდეს სააკაშვილთან, რაც შეიძლება სწრაფად, რადგან ის არის წამების მსხვერპლი. ასევე, მოითხოვენ, რომ ოქმად დაიდოს სააკაშვილის ჩვენება ამასთან დაკავშირებით და მოხდეს ამ საკითხის ინსპექტირება.

"ის იმყოფება უწყვეტი წამების ქვეშ. რეალურად სამედიცინო დახმარების გაწევა მისთვის არ ხდება, ამას გარდა ხდება მასზე მუდმივი ფსიქოლოგიური ზეწოლა. იგი ვერ აღებს ფაჯარას, ვერ აქრობს შუქს, იმიტომ, რომ ნებისმიერ ასეთ ვითარებაში იწყება გარედან ფსიქოლოგიური შტურმი, არამხოლოდ გინება, არამედ მუქარები, შემოვალთ და გაგისწორდებითო. შესაბამისად, მიხეილ სააკაშვილს არ სძინავს ამ ვითარებაში და პრაქტიკულად იმყოფება წამების ორი ფორმის ქვეშ, გარდა ყველაფერი დანარჩენისა, რასაც ქვია მუდმივი ხმაური და ანთებული შუქის პირობებში ყოფნა. ეს ორივე ხდომილება საერთაშორისო კონვენციებით განიხილება, როგორც წამება, ადამიანს როცა არ აძლევენ შეგნებულად ძილის საშუალებას", — განაცხადა მან.

ექსპრეზიდენტი უკვე 44-ე დღეა შიმშილობს. მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ, თუმცა იუსტიციის სამინისტრო ისევ უარზეა.