ავტოტრანსპორტის ტექნიკური გაუმართაობა, სიჩქარის გადაჭარბება თუ მანქანის სახიფათო და უყურადღებო მართვა, საქართველოს საქალაქთაშორისო ტრანსპორტირების სისტემაში ყველაზე პრობლემურია, - ეს წერია CRRC-საქართველოსა და პარტნიორობა საგზაო უსაფრთხოებისთვის მიერ შემუშავებულ უსაფრთხო მგზავრობის პოლიტიკის დოკუმენტში, რომელიც დღეს გამოქვეყნდა.

დოკუმენტის მიხედვით, მსოფლიოს ჯანდაცვის ორგანიზაციის (WHO) თანახმად, საქართველოს გზებზე სიკვდილიანობის ერთ-ერთი ყველაზე მაღალი სტატისტიკა აქვს მსოფლიოში და გზებზე სიკვდილიანობის მზარდ ტენდენციას აჩვენებს. საშუალოდ, საქართველოში ერთ სულ მოსახლეზე გადათვლით, მილიონ მოქალაქეში დაახლოებით 162 კვდება. ეს თანაფარდობა ევროკავშირის 2015 წლის საშუალო მონაცემს სამჯერ აღემატება.

"მიკროავტობუსებს უდავოდ შეაქვთ წვლილი საქართველოს გზებზე ავტოსაგზაო შემთხვევების მაღალ მაჩვენებელში. მიუხედავად იმისა, რომ უყურადღებო და საშიში მართვის პრაქტიკა და მასშტაბები სამარშრუტო ტაქსებში განსხვავებულია, ავტომობილის სახიფათოდ ტარების ესა თუ ის ფორმა ნებისმიერ მიკროავტობუსში გვხვდება," - აღნიშნულია უსაფრთხო მგზავრობის პოლიტიკის დოკუმენტში.