დროას ლიდერის, ელენე ხოშტარიას განცხადებით, სტრასბურგის სასამართლომ გადაწყვეტილებით დაადასტურა, რომ მესამე პრეზიდენტი, მიხეილ სააკაშვილი შიმშილობს და ამით უგულებელყო მთავრობის ყველანაირი სპეკულაცია. მისი თქმით, სტრასბურგმა თქვა, რომ "მორჩით მაიმუნობას და გამოუშვით ინფორმაცია", რადგან ის ხედავს საფრთხეს.

"ხელისუფლებას დღეს პირდაპირ შეუძლია, მათ შორის, საკუთარი პრაგმატული ინტერესებიდან გამომდინარე, მიხეილ სააკაშვილი სამოქალაქო კლინიკაში გადაიყვანოს, სტრასბურგთან დამატებითი პრობლემები არ შეიქმნას და გააგზავნოს ინფორმაცია მის უსაფრთხო და სამედიცინო თვალსაზრისით მნიშვნელოვანი, სწორი გარემოს შესახებ. დღეს მოგვეცა კიდევ ერთი შანსი, რომ გამოვიდეთ ამ მწვავე, მოკლევადიანად მწვავე კრიზისიდან", — აცხადებს ხოშტარია.

ამასთან, ხოშტარიას თქმით, სტრასბურგის გადაწყვეტილება არის საკითხი, რომლის პოლიტიზება და პარტიული ინტერპრეტაციით გამოყენება არის აბსოლუტურად დაუშვებელი.

"დაუშვებელი არა უბრალოდ კეთილსინდისიერების კატეგორიებით, არამედ მიაყენებს ძალიან დიდ, დამატებით დიდ ზიანს მთლიანად ქვეყანას და აქ ქართულ ოცნებას, მთავრობას, ზოგადად, არავის არ აქვს დიდი მანევრის საშუალება. ეს აუცულებლად გამოიწვევს ძალიან სერიოზულ მძიმე შედეგებს ნებისმიერისვის, ვინც დაიწყებს ამით მანიპულირებას", — აღნიშნა მან.

როგორც ის აღნიშნავს, უნდა გვესმოდეს, რომ ტყუილების საუბარი, რა გადაწყვიტა სტრასბურგმა, ვერანაირი შედეგის მომტანი ვერ იქნება. ხოშტარის შეფასებით, სასამართლოს მიერ სააკაშვილისთვის შექმნილ პირობებზე დეტალური ინფორმაციის მოთხოვნა უკვე ნიშნავს, რომ პროცესი უკვე არის არა მხოლოდ საქართველოსა და ელჩების, არამედ სტრასბურგის მონიტორინგის ქვეშ.

"სტრასბურგში მოუწევთ, მაგალითად, იმ კადრების ჩვენება, როგორ ატყუებენ სააკაშვილს გადაყვანის დროს, იმ კადრების ჩვენება, რომელიც არის მისი ნებართვის გარეშე გამოქვეყნებული, რაც უკვე არაერთი არასამთავრობოს მიერაა შეფასებული, როგორც არაადამიანური, ღირსებისშემლახავი მოპყრობა.

სტრასბურგი ნახავს, რომ გლდანში ნამდვილად არ არის საკმარისი პირობები არც მისი უსაფრთხოების და არც სამედიცინო მომსახურებისთვის. ამიტომ, უმაღლესი ინსტიტუტი აკონტროლებს ახლა ამ პროცესს, მიცემულია თან ამ მეთვალყურეობისთვის ძალიან კონკრეტული ვადა და ეს ორი კვირა ჩვენთვის ყველასთვის და პირველ რიგში, ხელისუფლებისთვის, არის შანსი, რომ გამოვიდეს ამ ქვეყნისთვის უკიდურესად დამაზიანებელი კრიზისიდან", — ამბობს ის.

სტრასბურგის სასამართლომ საქართველოს ხელისუფლებას შიმშილობის შემდეგ მიხეილ სააკაშვილის შესაბამისი მკურნალობა დაავალა. მათივე გადაწყვეტილებით, სახელმწიფომ, ციხეში და ზოგადად, სააკაშვილის უსაფრთხოება უნდა უზრუნველყოს. მათ მთავრობას სააკაშვილის ჯანმრთელობის ამჟამინდელი მდგომარეობის შესახებ ინფორმაციის მიწოდება სთხოვეს, სააკაშვილს კი შიმშილობის შეწყვეტისკენ მოუწოდეს.